Дьааҥы улууһугар Оһохтоох учаастагар биир булчут тыатааҕыны ытаары алҕаска 17 саастаах уолу ыппыт. Билигин бу быһылаан чахчытынан өрөспүүбүлүкэ ИДьМ бэрэбиэркэни ыытар.
Бэҕэһээ, от ыйын 15 күнүгэр, бассаабынан Дьааҥы улууһугар Оһохтоох учаастагар Эҥэ нэһилиэгин олохтооҕор эһэ саба түспүтүн, онуоха табаарыһа быыһаары алҕаска уолу ыппытын туһунан иһитиннэрии күүлэйдээбитэ.
ИДьМ бу дойҕоҕу сороҕун чахчы буолбут диэн бигэргэттэ:
“Дьааҥы улууһун ИДьМ салаатын дьуһуурунай чааһыгар балыыһаттан түөһүгэр саанан ытыллыбыт 17 саастаах оҕо киирдэ диэн иһитиннэрбиттэрэ. Быһылаан буолбут сиригэр тута силиэстийэлиир-оперативнай бөлөх тиийбитэ. Барыллаан силиэстийэ иһитиннэрбитинэн, Оһохтоох учаастагыттан 70 км тэйиччи сиргэ булчуттарга утары тыатааҕы тахсыбыт, онно эмсэҕэлээбит оҕо сылдьыспыт. Биир булчут тыатааҕыны ытаары алҕаска уол хаҥас саннын таппыт. Билигин эмсэҕэлээбит уол улуус кин балыыһатыгар сытар, эпэрээссийэ кэннэ туруга үчүгэй”, - диэн ИДьМ пресс-сулууспата иһитиннэрэр.
