“АЛРОСА” уонна “Zimbabwe Consolidated Diamond Company” (ZCDC) диэн алмааһы хостуур хампаанньа, Зимбабве дойдутугар күндү тааһы хостуур сир оҥоруутугар бииргэ үлэлиир туһунан сөбүлэҥи, “АЛРОСА” хампаанньа генеральнай дириэктэрин солбуйааччы Владимир Марченко уонна ZCDC дириэктэрдэрин сэбиэтин толоругаһа суох бэрэссэдээтэлэ Киллиан Укама баттастылар. Манна Зимбабве өрөспүүбүлүкэтин бэрэсидьиэнэ Эммерсон Мнангагвы уонна “АЛРОСА” генеральнай дириэктэрэ Сергей Иванов кыттыыны ыллылар.
Сөбүлэҥ быһыытынан “АЛРОСА” хампаанньа “greenfield” бырайыактары оҥорууга 70% хонтуруолунай бакыаттары ылар. Оттон ZCDC – 30%. Холбоһук тэрилтэ, бастакынан, “greenfield” сири чинчийиинэн дьарыктанар. Инникитин күндү тааһы хостоон тас ырыынакка атыылыыр сыал-сорук турар.
Холбоһук тэрилтэ ZCDC лицензиялаах эрэ сирдэригэр буолбакка, бүтүн дойду үрдүнэн үлэлиир кыахтаах. Үчүгэй сир көһүннэҕинэ хампаанньа, Зимбабве шахта уонна руда хостуур бырамыысалынас сайдыытын министиэристибэтигэр быһа тахсан лицензия оҥотторор.
“Холбоһук тэрилтэни тэрийии Зимбабве партнердарын кытта бииргэ үлэлээһиҥҥэ улахан хардыы буолар. Үчүгэй сирдэри чинчийиигэ уонна инникитин күндү тааһы хостуурга таһаарыылаах үлэҕэ бэлэммит. Биһиги исписэлиистэрбит Зимбабвеҕа үлэлээбиттэрэ номнуо үс ыйтан орто. Дойду салалтата кинилэргэ улахан өйөбүлү оҥорор. Холбоһук тэрилтэбит иһинэн үлэлиир бырайыактар араастар. Сороҕо күһүҥҥэттэн үлэлиэҕэ. Баар сирдэртэн Чиманимани эрэгийиэнин сирдэрин көрөбүт” – диэн “АЛРОСА” хампаанньа генеральнай дириэктэрин солбуйааччы Владимир Марченко иһитиннэрдэ.
2018 сыл ахсынньытыгар “АЛРОСА” хампаанньа Зимбабвеҕа “ALROSA (ZIMBABWE) Limited” диэн дочернэй хампаанньаны тэрийбитэ.
Ыспараапка: “АЛРОСА” хампаанньа RJC, WDC уонна DPA иһинэн ылыллыбыт корпоративнай халыыпка уонна эбэһээтэлистибэҕэ сөп түбэһиннэрэн үлэтин ыытар. Бу халыыптар Зимбабвеҕа “АЛРОСА” үлэтигэр туттуллуохтара. Хампаанньа Маранге эрэгийиэҥҥэ тахсар туһунан кыаҕы көрбөт.
