Күн бүгүн Мииринэй авиа-тэрилтэтин ааҕыныстыбатыгар билиэт атыытын үгэнэ. Алмаастаах кыраай дьоно бэйэлэрэ талбыт куруортарыгар сынньаналлар.
Тоҕо диэтэххэ, “Голубая волна” (Геленджик), “Прометей” (Туапсе) курдук сонотуоруйдар “профильнайа” суох буоланнар АЛРОСА хампаанньа састаабыттан тахсан эрэллэр. Мантан сиэттэрэн дьон Сочига, Анапаҕа, Крымҥа, Белокурикаҕа (Алтай), ханна талбыт сирдэригэр айанныыллар. Икки сылга биирдэ айаннарын ороскуота АЛРОСАнан төлөнөр буолан – оһуобай. Соҕуруу айаннааччы туһунан. Оттон Мииринэйгэ миэстэтигэр оҕо сынньалаҥар ураты болҕомто ууруллар. Быйыл сайын “АЛРОСА” үлэhиттэрин “Орленок” оҕо сынньанар лааҕыра үс симиэнэнэн тигинэччи үлэлиир. Үһүс симиэнэ атырдьах ыйын 3 -23 күнүгэр диэри үлэлиир. “АЛРОСА” үлэhитин оҕото буоллаҕына, путевка сыаната 15 тыһ солк эрэ. Атыттарга – 50.000 солк!
Мииринэйгэ, Удачнайга, Айхалга уонна Алмазнайга оҕо былаhааккалара үлэлииллэр. Ленскэй куоратыгар “Алмаз” сынньанар лааҕыр үлэлиир. Онон, оҕо сынньанарыгар усулуобуйа кэриччи баар. Быйыл эмиэ түгэн тосхойбутун туhанан Мииринэй оройуонун дьоно, бу сайын ханна сынньанар санаалааахтарын, былааннаахтарын токоолостум.
Н.Сарычев:
– Кэргэмминээн алта уон сааспытын туола иликпит. Онон Хара муораҕа диэри айан ороскуотун толору төлүүбүт. Мин 57, кэргэним 56 саастаахпыт. Оттон “Мииринэй-Москуба-Симферополь”, “Мииринэй-Новосибирскай-Краснодар” эриэйсэлэр сыаналара – 21, 27 тыһ солк. Бу айаммыт ороскуотун тэрилтэбит толору уйунар буолан үчүгэй. 60 cаастаах эбиппит буоллар Крымҥа, Симферопольга диэри 8 тыһ солк эрэ төлүө этибит.
В.Дмитриев:
– Быйыл Таилаҥҥа Пхукекка дьаарбайа, сөтүөлүү барарга былаанныыбын. Табаарыстарым урут хаста да сылдьан тураллар. Хайгыыртан соло булбаттар. Мин кинилэри батыһа эрэ сылдьабын. Новосибирскайга эрэ тиийиэхпитин наада. Онтон Таилаҥҥа айанныыр судургу. Турфирмалар уонча күннээх турдаахтар эбит. Сыаналара чэпчэки.
В.Тренцов:
– Анапаҕа дойдубар куруук сынньанабын. Хата, биһиэхэ Анапаҕа, ыраас муоралаах, дэлэй кумахтаах сиргэ кэлиҥ, ыалдьыттааҥ. Кэмсиниэххит суоҕа. Дьоҕус куорат буолан муора, пляж субу тураллар.
Н.Аммосова:
– Москубалыыбын. Онтон Владимирскай уобаласка сынньана барыам. Москубаҕа диэри 55-тэн үөһэ саастаах биэнсийэлээхтэргэ авиабилиэккэ субсидия көрүллэр. Айан сыната чэпчэки.
В.Ким:
– Крымҥа барар былааннаахпын. Мииринэйтэн Симферопольга диэри айанныыбын. Онтон, Херсонес диэки муора кытылыгар, чааһынай сонотуорйга барыам этэ.
А.Емец:
– Краснодарскай кыраайга Джубга бөһүөлэккэ төрдүс сайыммын сынньанабын. Дьаабылыка, груша, слива, арбуз, кизил дэлэйдик үүннэр. Дьиҥнээх ырай дойдута. Уонча күн буолаат фрукта тото-хана сиэн, муораҕа сөтүөлээн, ып-ыраас уулаах хайа үрүччэлэригэр сылдьан букатын ыарыыларбын умна быhыытыйабын.
Салимов Озодбек:
– Дойдубар Кыргызстаҥҥа Ош диэн куоракка сынньаныам. Түөрт сыл устата сынньаммакка үлэлээтим. Бэйэм суоппарбын. Оштан ордук үчүгэй сынньанар сири билбэппин. Эт, үүт аhылык, фрукта сыаналара, Мииринэй сыанатыгар холоотоххо биэс төгүл чэпчэки.
А.Тартыев:
– Ханна да барбаппын. Үһүс сылбын Мииринэйгэ сайылыыбын. Үлэбиттэн ыыппаттар. Ол оннугар ботуччу бириэмийэ аахсыам турдаҕа.
В.Семенов:
– Дойдубар Сунтаар улууһугар сынньана барыам. Оттуом, дьиэ тутуһуом, кустуом, сир астыам. Соҕуруу хаһан да барааччым суох.
Станислав Алексеев, Мииринэй куората. Ааптар хаартыскалара.
