Мииринэй – олус чөкө, тупсаҕай куорат. Кини чэчирии сайдарын туһугар араас кэмнэрдээҕи салайааччылар үгүс сыраларын уурбуттара мэлдьэһиллибэт.
Холобур, Ленскэй Орто Наахаратыттан төрүттээх Анатолий Тарасович Попов кулубалаан олорор кэмигэр, “Бүлүүлүүр биһилэххэ”(“Вилюйское кольцо”) бүтүн сынньанар тиһик, геологтарга уонна каюрга пааматынньык туруоруллубута, Аҕа дойду Улуу сэриитигэр анаммыт Кыайыы болуоссатын тупсаран саҥалыы оҥорбуттара, Сталиҥҥа пааматынньык баар буолбута.
Хомойуох иһин, ыччат дьон тугу да сыаналаабата, быдьар быһыыта кэлэтэр.
Ыччаттар ыстарар боллуоннаах кыраасканан пааматынньыктары буортулаан көччүйэллэр. Ким да ону буойара, дьарыйара көстүбэт. Геологтар пааматынньыктара турар “Бүлүүлүүр биһилэххэ”, ыччаттар киэҥ сири эргиччи сырдатар уот ситимин алдьаттылар, улахан ороскуот таһаардылар.
Оттон Мииринэй куоратын төрүттээбит Виктор Тихонов пааматынньыгын, хаста-хаста кыраасканан дьабайдаатылар! Бэл куорат киинигэр турар Ленин пааматынньыгын сүгүн туруорбаттар. Мэник-тэник кыргыттар Ленин пааматынньыгын сирэйигэр памааданан сотуоххайдыыллар, селфилииллэр, араастаан көччүйэллэр.
Мииринэй куорат мээрийэтэ пааркабытын оҥорууга, өрөмүөннээһиҥҥэ элбэх сыратын уурда. Билигин паарка кэрэ-бэлиэ нөрүөннэннэ. Арай биир суол мунчаардар. Ол - киирээти кытары, паарка уҥа өттүгэр турар сэргэлэр. Олус ньүдьүрээн, иэҕэйэн-куоҕайан, араас суруктарынан тырыта сотуллан тураахтыыллар.
Киһи дьиксинэрэ диэн – сэргэлэри ааһар дьон сурук-бэлиэ суруйан хаалларалларыгар, былаас, култуура эйгэтэ харалҕан буолуулара.
Ким да бу түктэри быһыыны дьаалайбат, улахаҥҥа уурбат эбит. Ама, бу маннык ньүкэн сыһыаны көрбөттөрө-билбэттэрэ буолуо дуо?!
Муҥ саатар, Мииринэйгэ уруккуттан олорор кырдьаҕастар, бу сэргэлэр тастарыгар, видео-кэтэбил туруоралларын туруорсуо эбиттэр. Сиэрдээхтик эттэххэ-тыыннахха, сэргэлэри харыстыах баара.
Оттон сахалыы итэҕэл өттүнэн көрдөххө, бу сэргэлэр, бүтүн Мииринэй куоратын, алмаастаах кыраайы, омугуттан, итэҕэлиттэн тутулуга суох араҥаччылыыр тустаахтар.
Ил, Эйэ, нус-бааччы олох туһугар алгыс тыллар аргыстаах, аал уокка арыылаах кыл бэлэхтээх туруоруллубуттара. Сэргэ – төрүт олохтоох омуктар киэн туттуулара. Ону болҕойорбут, оҥоһуллубуту харыстыырбыт ирдэнэр. Туох барыта сэттээх, сэмэлээх буоларын умнумуоххайыҥ.
Станислав Алексеев. Мииринэй куората. Ааптар хаартыскалара.
