Киирии

Киирии

Итини истэн баран, Дьоллоох Дьокуускай куорат дуу, чугас-ыраах тыа улуустарын дьоно сымыһахтарын быһа ытырбахтыыр буолуохтаахтар.

Онуоха сиһилии быһааран биэрэбин.

Мииринэйгэ Накыын баахтатын боппуруостарынан дьарыктанар тэрилтэ бу бөһүөлэккэ отут күннээх үлэҕэ, уопсай дьиэлэри сууйааччылары 37 тыһ.солк. хамнастаан туран, итиэннэ ити үлэлэри сүрүннээччини (50 тыһ.солк) көрдөөбүтэ ыраатта. Айаннарын ороскуота төлөнөр, баахта кэмигэр уопсайга олоруулара – буор-босхо. Дьэ, ол да үрдүнэн үлэлиэн баҕалаах тоҕо эрэ көстүбэт.

Сорох дьон Мииринэйгэ үрдүк хамнас ылалларын көрөн, кыраҕа ымыттыбат буолбуттар дуу хайдах дуу диэҕэ. Бэл, Орто Азияттан кэлэн үлэлиир уруулуу омуктарбыт улахаҥҥа ууран үлэлии сорумматтар, кыра хамнастаах диэн сирэллэр.

Аны баахтаттан тэйэн, олохтоох усулуобуйаҕа тиийиэххэ.

Мииринэйгэ бэйэтигэр 87 тыһыынча солк. хамнаска, коррекционнай тииптээх оскуолаҕа устуоруйа учууталын көрдөөбүттэрэ эмиэ ыраатта. Ким да саантаабат. Тэлэбиидьэнньэҕэ 82 тыһыынча солк. хамнаска сүрүннүүр эрэдээктэри ыҥыран ахан биэрдилэр. Мииринэй тыйаатырыгар хас да сылы супту 50 тыһыынча солк. хамнаска артыыһы көрдөөн сыралара-сылбалара баранна. Арыылаахха олохтоох ФАПка бэрт өр акушеры көрдөөтүлэр (58 тыһ.солк). Оттон Сүлдьүкээр ФАПгар 70 тыһ. солк хамнаска быраас ыҥыраллар, тупсаҕай усулуобуйалаах дьиэнэн хааччыйаллар. Ким да биллибэт.

Даҕатан эттэххэ, Иркутскай уобалаһыттан, Мииринэйгэ, ыал-ыалынан, уруу-уруунан, ааллаан кэлэллэр. Бирэмээнэ быыстала суох.Мииринэй хамнаһын, биэнсийэтин харчытын ылаат, кинилэр харахтара бычалыччы ууланар, долгуйан, бобо бөптөрөллөр. “Тыый, маннык хамнаһы биһиги харахтаабатахпыт” дииллэр.

Оттон биһиги дьоммут, арыый да үчүгэй хамнаһынан 150-200 тыһыынча солк эрэ ааттыыллар.

Санатан эттэххэ, Мииринэй оройуонун үрдүнэн, орто хамнас, 2019 сыл саҥатыгар - 102.330 солк буолан турар.

Станислав Алексеев, Мииринэй куората.

Тарҕат:

Комментарии

Защитный код Обновить