Роспотребнадзор Саха сиринээҕи салаатын пресс-сулууспата иһитиннэрбитинэн, 11 сүһүрбүт киһиэхэ “Сальмонеллез” диагноһы туруорбуттар.
Атырдьах ыйын 16,17, 18 күннэригэр “София” уонна “Белые ночи” эрэстэрээннэргэ урууга сылдьыбыт 42 киһи сүһүрбүт. Олортон 28 киһи Хаҥалас, Мэҥэ Хаҥалас, Уус Алдан балыыһаларыгар уонна Дьокуускайдааҕы клиническэй балыыһа инфекционнай салааларыгар киирбиттэр.
“Бэрэбиэркэ түмүгүнэн санитарнай кэһиллиилэр бааллара биллибит. Ол курдук, сиикэй уонна буспут аһы биир холодильникка харайа сылдьыбыттар. Сорох үлэһиттэр мэдиссиинэ докумуона суох үлэлээбиттэр”, – диэн иһитиннэриигэ суруллар.
Бэлэм астан алта, сиикэй астан үс боруобаҕа уонна икки үлэһиккэ сальмонеллез кыарыыны көбүтээччи баара биллибит.
Бэрэбиэркэ түмүгүнэн аһынан хааччыйар икки урбаанньыкка административнай силиэстийэ тэриллибит. Бородууксуйалартан лабораторнай чинчийиигэ боруобалар ылыллыбыттар.
Роспотребнадзор Саха сиринээҕи салаата “Сеул” ХЭ тэрилтэ Дзержинскэй уулуссатын 69 баар түөрт эрэстэрээнин: “Белые ночи”, “София”, “Пхеньян Гван” уонна “Стелла” быстах кэмҥэ үлэлэрин тохтотто.
