Балаҕан ыйын 1 күнүгэр Саха сиригэр “Добро в руках” диэн аахсыйа буолан ааста. Манна 700 тахса үөрэнээччи сибэкки дьөрбөтүн атыылаһар харчыларын кэмчилээннэр доруобуйаларыгар хааччахтаах оҕолорго көмө оҥордулар. Бу туһунан “Харысхал” аһымал пуонда пресс-сулууспата иһитиннэрэр.
“Аахсыйа ис хоһооно маннык, улахан сибэкки дьөрбөтүн атыылаһыах кэриэтэ биирдии устуука сибэккини хомуйан учууталга бэлэхтиэххэ сөп. Уонна онтон ордубут харчынан наадыйар дьоҥҥо көмөлөһүөххэ сөп”, – диэн пресс-сулууспа үлэһиттэрэ быһаараллар.
Быйыл аахсыйа номнуо үһүс төгүлүн ыытылынна. Бу хамсааһыҥҥа Дьокуускай куорат, Маҥан, Хатас, Өлөөн, Өлүөхүмэ, Чурапчы улуустарыттан 29 кылаас кытынна. Ону таһынан, биирдиилээн үс үөрэнээччи уонна Автодорожнай, Промышленнай уокуруктарын дьахталлар сэбиэттэрэ кытыннылар.
Үөрэнээччилэр көмөлөрүнэн 181 550 тыһ солк хомуллубут. Бу харчынан “Харысхал” пуонда доруобуйаларыгар хааччахтаах оҕолорго аналлаах күһүҥҥү, күнүскү былаһаакканы тэрийиэ. Сорох харчы Максим Сашинов Челябинскай куоракка “Сакура” мэдиссиинэ киинигэр эмтэнэригэр бэриллиэ.
“Биир төрөппүт “Добро в руках” аахсыйаҕа кыттыахха диэн этии киллэрбитэ. Биһиги үөрүүнү кытта сөбүлэспиппит. Улахан сибэкки дьөрбөтүн ылыах оннугар харчыны кэмчилээн көмөҕө ыытар олус үчүгэй идиэйэ дии саныыбын. Сибэкки хатар, кэхтэр онтон үтүө санааны оҥоруу оҕолор олохторугар биир улахан хардыы буолар”, – диэн Саха политехническай лицей иккис кылааһын үөрэнээччитин Кирилл ийэтэ Мария Аянитова кэпсиир.
“Кылааспыт салайааччыта Надежда Афанасьевна өйөбүлүнэн биһиги үтүө дьыаланан бэһис кылаастан дьарыктанабыт. Хас сыл аайы мас олордобут, кыаммат дьоҥҥо ас, таҥас хомуйабыт. Үтүөнү оҥорор Антон Васильев биһиги доҕорбут. Бох-сах хомуйуутугар көмөлөһөөччүбүт. “Добро в руках” аахсыйа биһиэхэ үгэс курдук буолла. Бу хамсааһыҥҥа тута кыттыһан үлэлээн барбыппыт. Уопсастыбаҕа бэйэ-бэйэҕэ көмөлөһүү олус наадалаах. Ол иһин, бу аахсыйа сайдарыгар баҕалаах дьону ыҥырабыт”, – диэн Дьокуускайдааҕы 17-с №-дээх оскуола 10 кылааһын үөрэнээччитэ Сергей Кузнецов кэпсиир.
“Бу олус үчүгэй аахсыйа. Ол иһин, мин кыттыыны ыллым. Оҕолор оҕолорго көмөлөһөллөрө олус үчүгэй”, – диэн Саха политехническай лицей 3 кылааһын үөрэнээччитэ Леонид Егоров санаатын үллэстэр.
