Уһук Илиҥҥэ сылга икки бырыһыаннаах ипотека өрөспүүбүлүкэҕэ ыччаты тутан хааларга уонна эдэр исписэлииһи угуйарга төһүү буолуо диэн Ил Дархан этэр.
“Биһиги бу этиини Уһук Илиҥҥэ ыччаты угуйарга уонна олохтоох ыччат ханна да барбакка төрөөбүт өрөспүүбүлүкэтигэр хааларыгар төһүү буолуо диэн киллэрбиппит. Хомойуох иһин, күн бүгүн Уһук Илинтэн 16-30 саастаах ыччат ордук көһөн барар. Оттон кинилэр манна төрөөбүттэр, улааппыттар, үөрэммиттэр ээ” , — диэн Айсен Сергеевич тоһоҕолоото.
Инньэ гынан, Саха сиригэр манна туох да туппат атын эрэгийиэн испислэиистэрин ыҥырарга күһэллэллэр.
“Өскөтүн биһиги ыччаты тутан хааллахпытына, кинилэр манна үөрэнэн, үлэлэн, дьиэ-уот тэринэн олохсуйа хаалыа этилэр буоллаҕа дии. Ити киһи ресуратын туһанарга табыгастаах. Мин биһиги этиибитин дойду бэрэсидьиэнэ өйөөбүтүттэн үөрүөх эрэ тустаахпын. Кини биһиги этибитин өйөөн, сарсыныгар номнуобырабыыталыстыбаҕа тобулуҥ диэн сорудах биэрбитэ” , — диир Айсен Николаев.
Санатар буолахха, Владимир Путин ВЭФ кэмигэр эдэр ыалларга аналлаах сылга 2%-наах ипотеканы киллэрэри биһириирин биллэрбитэ. Бу бырагыраама номнуо быйылгыттан үлэлээбитинэн барыаҕа уонна саҥа тутуллар дьиэлэргэ уонна чааһынай дьиэҕэ сыһыаннаах буолуоҕа.
