Саҥа оҕо былаһаакката оҕолор суолга сөптөөхтүк тутта-хапта сылдьарга үөрүйэхтэрин иҥэрэр соруктаах тутуллубут.
Дойду үрдүнэн оҕолор суол быһылааныгар эчэйиилэрэ тоҕоостоох кыһалҕа буолан турар. Хомойуох иһин, оҕолорго үөрэх тэрилтэлэригэр суол быраабылатын төһө да үөрэппиттэрин үрдүнэн, ордук куорат уулуссаларыгар оҕолор эчэйиини ылбаттарын толору мэктиэлээбэт. Онон оҕолорго теорияны эрэ буолбакка. Оонньуу быһыылаахтык көй салгыҥҥа, анал тэриллээх былаһааккаҕа суол быраабылатын иҥэрии туһалаах буолара саарбахтаммат.
Биир оннук былаһаакка соторутааҕыта Дьокуускайга үөрүүлээх быһыыга-майгыга арылынна. Былаһаакка Оҕо айымньытын Дыбарыаһын тиэргэнигэр турда.
Бу оонньуур комплексы куорат дьаһалтата, Үүнэр көлүөнэ Пуондата, “Воспитание – всем обществом” оҕолорго эбии үөрэхтээһини өйүүр уопсастыбаннай хамсааһын, Ф.И.Авдеева аатынан Оҕо айымньытын Дыбарыаһа, “Якутдорстрой” хампаанньа уонна СӨ ИДьМ Управлениетын өйөбүллэринэн үлэҕэ киирбит.
Былаһаакка үөрүүлээх аһыллыытыгар ГАИ үлэһиттэрэ кырачааннарга сүрүн суол быраабылатын билиһиннэрдилэр уонна салайааччыга оҕолорго аналлаах оонньуур нобуору туттардылар.
Былаһааккаҕа суол бэлиэлэрэ, суолу туорааһын баар. Ити оҕолор суол быраабылатын долоҕойдоругар хатыылларыгар кыаҕы биэриэҕэ. Үөрүүлээх тэрээһин чэрчитинэн “Көрдөөх сатыы суолу туорааччылар” диэн эстафета ыытылынна. Саҥа былаһааккаҕа суол быраабылатыгар дьарыктар куорат оҕолоругар тиһигин быспакка ыытыллыахтара. Бу туһунан ГИБДД Управлениета иһитиннэрэр.
