Балаҕан ыйын 12 күнүгэр, Дьокуускай куоракка, ньиэп уонна гаас эйгэтигэр үлэ дьаарбаҥката тэриллиэ. Дьаарбаҥка “Олохтоох каадырдар уонна бырамыысалыннас” диэн эрэгийиэннээҕи бырагыраама чэрчитинэн ыытыллар. Бу өрөспүүбүлүкэ салалтатын олохтоох нэһилиэнньэ Саха сиригэр баар бырамыысалыннас бөдөҥ тэрилтэлэригэр үлэлии киирэллэрин ситиһэр сыаллаах үлэтэ буолар.
Дьаарбаҥкаҕа “Газпром трансгаз Томск”, “Газпром добыча Ноябрьск”, “Сахатранснефтегаз”, “Якутская топливно-энергетическая компания”, “Саханефтегазсбыт”, “РНГ” уонна “Таас-Юрях нефтегазодобыча” курдук бөдөҥ хампаанньалар кыттыахтара.
Санатар буоллахха, ааспыт сыл түмүгүнэн бырамыысалыннастаах хампаанньаларга 5726 киһи үлэҕэ киирбит. Олортон 2357 киһи 30 диэри саастаах ыччат, 1782 – тыа сирин олохтоохторо. Ону таһынан, 879 киһи үөрэммит.
Билигин “Олохтоох каадырдар уонна бырамыысалыннас” бырайыакка 22 хампаанньа кыттар. 2019 сыл бастакы аҥаарыгар 3234 киһи үлэҕэ киирбит, олортон 1313 – 30 диэри саастаах ыччат. 1252 киһи баахтаҕа үлэлии барбыт, 895 – тыа сирин олохтоохторо.
2024 сылга диэри 27 бырамыысалыннас тэрилтэтигэр 27487 киһини үлэнэн хааччыйар сорук турар.
Дьаарбаҥка Кулаковскай уул., 48 (ХИФУ КФЕН) дьиэтигэр 14-00- 17-00 ч буолар.
