Киирии

Киирии

Балаҕан ыйын 9 күнүттэн “Саха” НКИХ саҥа сезонун саҕалаата. Көрөөччүлэри үгүс саҥа бырайыактар күүтэллэр. Ол курдук, оҕолорго аналлаах “Фиксики” мультик сахалыы саҥарыа, ону таһынан, “Өркөн өй”, “Асчыттар”, “Эр санаа”, “Үҥкүүлээ”, “Эн — сулускун”, “Готовим вкусно” уонна хас да сериаллар көстүөхтэрэ.

“Саха” НКИХ эфирнэй биэриитин дириэктэрэ Олег Колесов иһитиннэрбитинэн, сахалыы сонуннар уһуна 12 мүнүүттэн 30 мүнүүтэҕэ диэри уһаан биэриэ. Бу киэһээҥи 20:30 ч эфиргэ уонна прайм-тайм сыһыаннаах. Сонуннары таһынан инфографикалары уонна араас ырытыылаах репортажтары көрдөрөр буолуохтара.

“Тайна одного лета” (сэтинньи ыйга тахсар), “Иза уонна Лиза”, “Ложный пафос” диэн саҥа сериаллары көстүөхтэрэ. Икки бастакы сериал Даана Сард сценарийынан уһуллар, оттон үһүс – Марина Платонова сценарийа уонна кини режиссер буолар.

Олег Колесов бу сезон сүрүн соруга “Фиксики” диэн мультигы сахалыы саҥардыы буоларын бэлиэтээтэ. Ааспыт сезоҥҥа “Маша и Медведь” мультик сахалыы саҥарбыта. Онон хампаанньа үөрүйэхтээх. Ол эрэн, иккис мультигы тылбаастыыр быдан ыарахан диэн билинэллэр. Тоҕо диэтэххэ, 12 персонаһы саҥардыбыттар.

Биһиги хампаанньабыт бу мультигы сахалыы саҥардарга дуогабардаспыта. Биһиги эрэдээксийэбит мультик персонажтарын сахалыы саҥардарга кастиҥ ыытарга сорудах ылбыта. Уопсайа түөрт кастиҥы ыыппыппыт. Уонна хас биирдии куолаһы Москубалары кытта бигэргэппиппит. Ол түмүгүнэн бастакы 10 сиэрийэлэри бигэргэттибит”, – диэн оҕо эрэдээксийэтин салайааччы Лена Керемясова кэпсиир.

Билигин 125 сиэрийэттэн 31 сиэрийэ тылбаастаммыт. Бу туһунан Дим Димыч персонаһы сахалыы саҥардыбыт Арылхан Лебедев кэпсиир. “Мин персонаһым олус үчүгэй оҕо. Кинини кытта үлэлиир олус интэриэһинэй уонна судургу соҕус этэ. Тоҕо диэтэххэ, кини майгытынан-сигилитинэн миэхэ майгынныыр, — диэн Арылхан кэпсиир. Кини Саха тыйаатырыгар артыыс маастарыстыбатыгар үөрэммит.

Хас биирдии мультик таах уһуллубат. Оҕолору үөрэтэр, иитэр уонна сайыннарар сыаллаахтар. Сахалыы “Фиксики” мультик оҕолору төрөөбүт тылга эрэ буолбакка, аан дойду анимациятын култууратыгар үөрэтиэ диэммит эрэнэбит, — диэн Лена Керемясова бэлиэтиир.

ysia.ru

Тарҕат:

Комментарии

Защитный код Обновить