Киирии

Киирии

Былыр-былыргыттан Бүлүүчээн эбэтэр Хордоҕой сэлиэнньэтэ “үөс” сирдэри кытары холбуур суола-ииһэ суоҕуттан үгүс “буомнары” көрсөн олорбут нэһилиэк. Сатахха, сэлиэнньэ улуус кииниттэн – Сунтаартан 150 биэрэстэ ыраах сытар.

ССРС саҕана Ньурба авиа-этэрээтин “АН-2” сөмөлүөтэ кыра да самыырга көппөккө, барыа буоллар барбакка эрэйдээччи. Бүлүүчээн дьоно Сунтаар аэробаксаалыгар күнү күннүктээн, бөрөбүөскэ салаата тугу диирин кэтэһэн олорооччулар. Ньурбаттан кэлэр “Заря-9” теплоход (трамвай) баара-суоҕа 1978-1982 сылларга эрэ көхтөөхтүк сылдьан иһэн тохтообута. Онтон бэттэх сүрүн тыраанспарынан мотуордаах оҥочо өр кэмҥэ буола сылдьыбыта.

bylyycheencelennete

90-c cыллартан ыла олохтоохтор дьаныардаах туруорсууларынан “Бүлүү Чээнэ” диэн ааттаммыт катер сылдьар буолбута. Хата, үгүс алдьаныытын аахсыбатахха, дьону ыксаллаах, былдьаһыктаах кэмнэргэ сүрдээҕин абыраан турар. Уопсайынан, бүлүүчээннэр Сунтаарга араас кыһалҕалаах боппуруостарын быһаартара киирэллэригэр эргиччи эрэй этэ.

yaldyttargabalagan

Бастатан туран, катер сылдьыбат кэмигэр мотуордаах оҥочонон 60 биэрэстэни Бүлүү өрүс устун айаннаттыахха наада. Кутталлаах Күрдьүгүнүүр уоранын туорааннар, Кириэстээххэ кэлэннэр чаардыыллар. Онно эмиэ түһэр ыала суох дьоҥҥо – кыһалҕа. Көстүүнэй диэн Кириэстээххэ мэлигир. Айанньыттар ыалга олорон таксыы эбэтэр улуус киинигэр барар түбэһиэх тиэхиньикэни кэтэһэллэр. Эбиитин Мииринэйтэн иһэр таксыылар чугас барыахтаах дьону этириэс ылбат идэлээхтэр. Онтон Сунтаарга тиийэн төттөрү дойдуларын диэки барар тыраанспар кэпсэтэллэр. Онтуҥ дэбигис көстүбэт. “Дьокуускай-Мииринэй” таксыы Сунтаартан Кириэстээххэ диэри илдьэн бэрт. Дьэ эрэй диэтэҕиҥ!  

texnikacyola

Аны, ыраах сытар Бүлүүчээҥҥэ бааннар терминаллара суох. Дьон ыксаан Тойбохойго Сбербаан салаатыгар харчы уста бараллар. Салгыы балыыһаҕа көрдөрүнэ, дьиэ-уот, сир, ходуһа түүлэһиитин, бултуур саа боппуруостарын быһаара 150 биэрэстэ ыраах, Сунтаарга тиэстиэххэ наада. Быйыл сайын Сунтаартан Бүлүүчээҥҥэ диэри эриэйсэбэй оптуобус сылдьан иһэн эмискэччи тохтоон хаалла. Биэс сырыы кэнниттэн эмиэ отоойкоҕо олортулар. Онон массыыната суох дьон наар ким эрэ сирэйин-хараҕын маныы, ааттаһа, суол көрдөһө, төлөпүөн үрдүгэр олороохтуурга күһэллэллэр. Аны, суоппардарга Сунтаарга диэри төттөрү-таары тиэстии балачча бэнсиини, диисэл уматыгын сиир. Эргиччи – ороскуот. Ол да буоллар, Бүлүүчээҥҥэ бассаап көмөтүнэн таксыы булар судургутуйда. Айан суола билиҥҥитэ эппиэттиир. Ити курдук, бу сылларга Кириэстээхтэн Бүлүүчээҥҥэ диэри тыын суолталаах айанныыр суол тутуллан, дьон-норуот абыранна. Баччааҥҥа диэри улугуран олорбут кырдьаҕас нэһилиэк дьэ өрө тыынна.

 Станислав Алексеев, Мииринэй куората.

Тарҕат:

Комментарии

Защитный код Обновить