2025 сылга диэри болдьохтоох Уһук Илиҥҥэ демография бэлиитикэтин кэнсиэпсийэтэ олоххо киирдэҕинэ, Саха сирин нэһилиэнньэтэ 1 мөл. тиийиэн сөп.
Муус устарга Сахалиҥҥа IV төгүлүн ыытыллар Уһук Илин демографическай сайдыытын Бүтүн Арассыыйатааҕы кэмпириэнсийэтигэр демография бэлиитикэтин олоххо киллэриигэ “дорожнай каартаны” билиһиннэриэхтэрэ.
СӨ ыччат дьыалаларыгар уонна дьиэ кэргэн бэлиитикэтигэр министиэристибэтэ былааннаабыт дьаһаллара өрөспүүбүлүкэҕэ демография балаһыанньатын тупсарыыга туһуламмыт (оҕо төрөөһүнүн элбээһинэ, дьол олоҕо уһааһына уонна өлүү аччааһына). Бу дьаһаллар олоххо киирдэхтэринэ, 2025 сылга төрөөһүн кээписиэнэ 2,29 диэри улаатыахтаах (2017 сылга – 1,97 этэ), оттон нэһилиэнньэ ахсаана 1 мөл. диэри тиийиэхтээх (2018 сыл саҥатыгар 964,3 тыһ. киһи олорор). Бу 2025 сылга диэри туһуламмыт Уһук Илиҥҥэ демография бэлиитикэтин кэнсиэпсийэтин Саха сиригэр олоххо киллэриигэ эбии 34 млрд солк. көрүллэрэ наада.
