Балаҕан ыйын 13 күнүгэр Бүлүү куорат 385 сыллаах үбүлүөйүнэн, “Сахатранснефтегаз” хампаанньа үөрүүлээх быһыыга-майгыга гааһы тарҕатар ыстаансыйаны (ГРС) арыйда. Бу туһунан хампаанньа пресс-сулууспата иһитиннэрэр.
Саҥа ыстаансыйа 25000 м3/ч кыамталаах. Онно холоотоххо урукку ыстаансыйа – 10000 м3/ч.
“Гааһы тарҕатар аныгы, саҥа ыстаансыйа куорат социальнай-экономическай соруктарын ситиһэригэр кыах биэрэр. Ыстаансыйа “Сахатранснефтегаз” хампаанньа инвестиционнай бырагыраамматын суотугар тутулунна”, — диэн хампаанньа сүрүн инженерэ, Ил Түмэн дьокутаата Александр Гоголев эттэ.
Санатар буоллахха, урукку ыстаансыйа 1992 сыллаахха тутуллан үлэҕэ киирбит.
