Киирии

Киирии

Бу күннэргэ бассаабынан Сунтаарга Тойбохойго балаҕан ыйын 16 күнүгэр сенатор Акимов А.К., СӨ т/х миниистирэ Атласов курдук улахан салайааччылар кыттыылаах мунньахха “эһиил от ыйыттан илиинэн ыаммыт үүтү чааһынайдартан тутуу тохтуур, үүт сыаната 90 солк. быһылынна, чэбдигирдии бырагырааматыгар 25 сүөһүлээхтэр киирэн, биир төбөҕө 20 тыһ. ылар буоллаллар үһү” диэн соһутуулаах сурах тарҕанан сүөһү ииттэн олорор тыа дьонун утуппат да гына аймаата. Буолумуна, кэтэх хаһаайыстыбалар үүт туттарбат буоллахтарына, ынах бөҕө сүүскэ бэриллэр, тыабыт хаһаайыстыбата, төрүт дьарыкпыт букатын эстэр, умнуллар аакка барар. Ол кэннэ сахалар тоһуттар тымныылаах хоту сиргэ сүөһү иитэн аан дойду цивилизациятын байыппыппыт диирбит мэлийэр.

Кырдьыгы чуолкайдаһан СӨ т/х миниистирэ А.П. Атласовтан ыйыталастым. Александр Павлович: “Ити олох сымыйа сураҕынан дьону аймыыллар, оннук буолбатаҕа. Мин саҥа ылыллыахтаах т/х судаарыстыбаннай бырагырааматын бырайыага бырабыыталыстыба дьүүлүгэр сылдьар диэбитим.Ол бырайыакка үүт харчытын бэйэҕэ турар нормативнай ороскуотугар чугаһатан киллэрдибит, үбүнэн чэбдигирдиигэ 25 төбө сүөһүлээхтэр хабыллыахтаахтар диэн туруорсубуппутун кэпсээбитим. “Туймаада” ФАПК генеральнай дириэктэрэ П.С. Ефремов Арассыыйа үүтүн техрегламенын сокуона чааһынайдартан үүт тутуутун уустугурта, онон сокуону кэспэккэ үүт туттарар ньымалары толкуйдуоххайыҥ эрэ диэбитэ ”, - диэн кэпсээтэ.

Онон бассаап сымыйатын, төһө да “көмүс солотууланан” кырдьык курдук буолбутун иһин мээнэ итэҕэйимэҥ. Ньиэрбэҕин сиэн доруобуйаҕар охсууланыан сөп. Ону таһынан бэйэ-бэйэбитин итэҕэйсибэт буолабыт. Оттон үүт харчыта, атын да сыыппаралар т/х саҥа бырагыраамата бырабыыталыстыбанан бигэргэннэҕинэ сотору ­­чопчу биллиэхтэрэ.

Владимир Степанов.

Тарҕат:

Комментарии

Защитный код Обновить