Киирии

Киирии

Эрэдээксийэҕэ элбэх оҕолоох ыал эдэр ийэтэ Розалия Петрова кэлэ сырытта. Кини: “уолум, улахан дьон дьалаҕайыттан улаханнык эчэйэн, балыыһаҕа ыарахан туруктаах сытар, онуоха ким да эппиэтинэһи сүгэ илик”, – диэн долгуйар.

Атырдьах ыйын 19 күнүгэр Дьокуускай куорат 203-с түөлбэтигэр 2-1 куорпуска элбэх кыбартыыралаах саҥа тутулла турар дьиэҕэ куорат 7-с №-дээх оскуолатын 10-с кылааһын үөрэнээччитэ Женя Петров, 4 миэтэрэлээх үрдүктэн сууллан, улаханнык оһолломмут. Эмчиттэр “Кататравма, открытая черепно-мозговая травма, ушиб головного мозга” диэн ыарахан диагноһы туруорбуттар. Төбөтө хайа баран, аҥаарыгар трепанация оҥоруохтаахтар.

Розалия Николаевна кэпсииринэн, уолун уонна табаарыстарын тутулла турар эбийиэк үлэһиттэрэ – прораб уонна оробуочай – быстах үлэҕэ ылбыттар. Биллэн турар, үлэҕэ сыһыаннаах туох да дуогабар оҥоһуллубатах. Женя табаарыстарыгар бөҕү тиэйэллэригэр сорудахтаабыттар, оттон Женяны өһүө баалкаларын кырааскалыырыгар эппиттэр. Онуоха тутуу эбийиэгэр оһолтон харыстанарга туох да миэрэ ылыллыбатах. Оробуочай 4-с №-дээх полиция отделениетыгар биэрбит быһаарыытыгар: “Эчэйбит оҕо хас саастааҕын билэ сатаабатахпыт, тас көрүҥүнэн эрэ көрөн оҕо буолбатах дии санаабыппыт. Үөһэ ыттарыгар ханнык да харыстанар малы биэрбэтэхпит, тылбынан эрэ сэрэппитим”, – диэбит. Итиэннэ кини “АЭБ-Капиталга” оробуочайынан үлэлиирин быһаарбыт. Быһылаан буолаатын кытары, “Суһал көмө” эчэйбит оҕону балыыһаҕа илдьибит, онно суһаллык эпэрээссийэ оҥорбуттар. Онуоха тутулла турар эбийиэккэ кэлэллэригэр, сурунаалга илии баттаппыттар эбит да, билигин ол сурунаал чопчу ханна барбыта биллибэт...

5

2

Женя төрөппүттэрэ борокуратуураҕа, силиэстийэлиир уорганнарга сайабылыанньа суруйбуттар. Билигин быһылаан чахчытынан Сө Тутууга уонна олорор дьиэни дьаһайар, хонтуруоллуур управление (Госстройжилнадзор), Үлэ судаарыстыбаннай иниспиэксийэтэ, Арассыыйа Силиэстийэлиир кэмитиэтин Саха сиринээҕи управлениетын Дьокуускай куораттааҕы силиэстийэлиир салаата бэрэбиэркэни ыыталлар. Тоҕо эрэ Үлэ судаарыстыбаннай иниспиэксийэтэ уонна силиэдэбэтэл төрөппүттэригэр быһылаан номнуо буолбутун кэннэ “тэрилтэни кытары үлэ дуогабарын баттаһыҥ ээ, ол ордук буолуо” дииллэр. Тоҕо оннук ыххайаллара өйдөммөт. Дьиҥэ, оҕо улахан эчэйиини ылбытын кэннэ, тута күүстээх бэрэбиэркэ баран, холуобунай дьыала көбүтүллүөхтээх буолбат дуо? Борокуратуура, Силиэстийэлиир кэмитиэт да “билиҥҥитэ бэрэбиэркэ бүтэ илик, онон тугу эмэ быһаарар эрдэ” дииллэр. Борокуратууралар: “Холуобунай дьыаланы көбүтэр туһунан быһаарыыны Силиэстийэлиир кэмитиэт быһаарыахтаах. Биһиги Үлэ иниспиэксийэтэ ыыппыт бэрэбиэркэтин кэннэ, сокуоннай сааһын туола илик оҕону үлэҕэ ылбыттарын бэрэбиэркэлиэхтээхпит”, – дииллэр.

Ити быһылаан буолбут дьиэтин “АЭБ Капитал” ХЭУо генеральнай бэдэрээтчит быһыытынан тутар. Женя төрөппүттэрэ, бэйэлэрэ кыайан кырдьыктарын булуо суохтарын өйдөөн, Набережнай уокуруктан Ил Түмэн дьокутаата Мария Христофороваҕа “сиэрдээх быһаарыы ылылларыгар көмөлөс” диэн көрдөспүттэр. Онуоха дьокутаат эбийиэк генеральнай бэдэрээтчитэ, “АЭБ-Капитал” генеральнай дириэктэрэ Игорь Борисов аатыгар туһааннаах суругу ыыппыт. Кинилэр быһааралларынан, “эчэйбит, сокуоннай сааһын туола илик оҕону “Верес” ХЭУо (генеральнай дириэктэр С.Г. Афонскай) диэн тэрилтэ үлэҕэ “ылбыт”. “АЭБ Капитал” “верестэри” кытары бу дьыл ыам ыйын 27 күнүгэр эбийиэккэ үлэни ыытарга дуогабардаспыт. Биир интэриэһинэйэ баар, бу “Верес” диэн тэрилтэ 2019 сыллаахха ыам ыйын 6 күнүгэр саҥардыы тэриллибит. Бу сабыс-саҥа “буруолуу сылдьар”, 10 тыһ. солк. устааптаах хапытааллаах, тэриллибитэ баара-суоҕа 3 эрэ нэдиэлэ буолбут тэрилтэни итиччэ улахан эбийиэккэ хайдах дуогабардаһан ылбыттара эмиэ араас санааны үөскэтэр буолбатах дуо? Инньэ гынан бу эбийиэк генеральнай бэдэрээтчитэ “эмсэҕэлээбит оҕону биһиги тэрилтэбит буолбакка, “Верес” ылбыта, онон сокуон быһыытынан биһиги эппиэти сүкпэппит” диир. Оттон ол бүгүн баар, сарсын суох, атаҕар да тура илик, үлэлээбитэ 5-с ыйыгар барбыт тэрилтэ бу оҕо туһугар толору эппиэти сүгүө дуо? Ити эмиэ салгыҥҥа ыйанан хаалар курдук.

4

Оннооҕор улахан да киһи эчэйиэн сөптөөх, киһи олоҕор кутталлаах эбийиэгэр туох да куттал суоһаабат тиэхиньикэтин, сокуон ирдиирин курдук бары ирдэбили тутуспакка, оҕолору тоҕо үлэҕэ ыллылар? Баара-суоҕа 16 саастаах оҕо дьон дьалаҕайыттан инбэлиит буолбутугар ким эппиэти сүгэрий? Маныаха туһааннаах уорганнар сиэрдээх быһаарыыны ылыахтара диэн эрэнэбит. Биһиги бу балаһыанньаны кыраҕытык кэтээн көрөбүт.

Дмитрий ИВАНОВ.

Тарҕат:

Комментарии

Защитный код Обновить