Ньурба улууһугар аҕа саастаах дьон декадатын тэрийии номнуо үгэскэ кубулуйда. Манна олохтоохтор, үгүс тэрилтэлэр үлэһиттэрэ араас тэрээһиннэри ыыталлар. Ол курдук, Ньурбатааҕы техническэй лиссиэй 8 “А” кылааһын үөрэнээччилэрэ, үлэ уонна социальнай харысхал салалтатын үлэһиттэрин кытта тимуровскай рейдэлэри оҥордулар.
Үөрэнээччилэр тыыл, үлэ бэтэрээннэригэр уонна инбэлииттэргэ мас хайытан, тэлгэһэ иһин ыраастаан, алта бэтэрээҥҥэ Руслан Федотовтан биирдии куул хортуосканы илдьэн биэрдилэр уонна бөрүөгүнэн, барыанньанан күндүлээтилэр.
