Ууну ыраастыыр ыстаансыйа 14 нэһилиэккэ тутулла турар. Маныаха туһааннаах тиэхиньикэ атыылаһыллыбыт. Бу туһунан СӨ Дьиэ-уот хомунаалынай хаһаайыстыбатын уонна энергетикэҕэ министиэристибэтин пресс-сулууспата иһитиннэрэр.
“Билиҥҥитэ Үөһээ Бүлүү улууһун Харбалаах, Балаҕаннаах нэһилиэктэригэр уонна Ньурба Күндээдэтигэр ууну ыраастыыр ыстаансыйаны тутуу түмүктэнэр”, - диэн суруйаллар.
Маны таһынан, ууну ыраастыыр ыстаансыйалары Сунтаар улууһун Устье, Бүлүүчээн, Күндэйэ нэһилиэктэригэр туталлар. Онно үлэ тэтимэ график быһыытынан барар. Маннык ууну ыраастыыр ыстаансыйалары тутуу “Бүлүү сүнньүн улуустарыгар 2019-2024 сс. уунан хааччыйыыны сайыннарыы” бырагыраама иитинэн ыытыллар.
Атырдьах ыйыгар Үөһээ Бүлүү Хоротугар үлэҕэ киирбит ыстаансыйаҕа ууну хонтуруоллаабыттар. Онуоха автоматизированнай ууну ыраастыыр тиһиги ситэрэн биэрэр соругу туруорбуттар. Онно ыраастаммыт уу 47 көрдөрүүтүттэн иккитэ – уу дьүһүнэ уонна тимир тутулугар — нуорматтан арыый тахсыы баара биллибитэ. Хороҕо баар ыстаансыйаттан нэһилиэнньэҕэ ууну биэрии Роспотребнадзор көҥүлү биэрбитин кэннэ саҕаланыаҕа. Ыстаансыйаны үлэлэтии быһа барыллаан бу дьыл алтынньы 5 күнүттэн саҕаланыаҕа. ДьУоХХ миниистирэ Дмитрий Садовников “ДьУоХХ” ГУТка нэһилиэнньэҕэ төһө сыанаҕа ууну атыылыылларын ааҕан-суоттаан киллэрэллэригэр сорудахтаата.
Бүлүү сүнньүгэр иһэр ууну ыраастыыр ыстаансыйалары тутуу бырагыраамата Ил Дархан “Саха сиригэр экологияны тупсарыы” уурааҕар олоҕуран ыытыллар. Ону АЛРОСА 150 мөл. солк. Үүнэр көлүөнэ Пуондатыгар биэрэр харчытынан үбүлэнэр.
