“АЛРОСА” генеральнай дириэктэрэ Сергей Иванов хампанньа хаһаайыстыбаннай актыыбын түмүктэрин иһитиннэрэригэр, Үөһээ Муунатааҕы алмаастаах сиригэр каадырдары үлэҕэ ыларыгар хампаанньа үлэлиир улуустарын олохтоохторуттан талыаҕа.
“Удаачнайдааҕы ХБК сулууспалара саҥа үлэһиттэри ылыыга “дорожнай каартаны” оҥорон турар. Бу сылга 400 үлэһити ылыахпыт, оттон эһиил – 200-300 саҥа үлэһити. Үөһээ Муунатааҕы сир баайдаах сири үлэлэтэргэ номнуо бэлэммит, былааннаммытын курдук арыллыаҕа. Бу сыл 4-с кыбаарталыгар саҥа руднигы үлэлэтиэхпит уонна үрдүк хамнастаах үлэҕэ дьону ылыахпыт. Биһиги хампаанньаабыт үлэлиир улуустарын олохтоохторуттан саҥа каадырдары тала сатыахпыт” – , диэн хампаанньа баһылыга эттэ.
Үөһээ Муунатааҕы алмаастаах сир “АЛРОСА” саамай “эдэр” сир баайдаах сирэ. Бу сир Удаачнайдааҕы ХБК-тан 170 км сиргэ баар уонна 4 кимберлит туруупкатыттан турар.
2017 сыллаахха “Заполярнай” карьерга аһаҕас ньыманан хостуур үлэ саҕаламмыта. Удачнайдааҕы ХБК бэрэстэбиитэлэ Павел Егоров иһитиннэрбитинэн, Үөһээ Муунатааҕы сир баайдаах сиртэн 75 тыһ. т урууда сууйуу кэмбинээт устуоруйатыгар өссө бэлиэтэнэ илигэ. “Урууданы боруобалааһын түмүктэрэ үөрдэр. Геологическай үлэ кэннэ биллибитинээҕэр, онно алмаас саппааһа икки төгүл элбэх диэн көрдөрдө. Манна бөдөҥ алмаас элбэх уонна кинилэр ураты дьүһүннээхтэр” диэтэ.
Санатар буоллахха, Үөһээ Муунатааҕы алмаастаах сири баһылааһын АЛРОСА хампаанньа бөлөҕө Саха сиригэр ыытар биир улахан бырайыагынан буолар. Бу сир баайдаах сиртэн алмааһы бырамыысалыннайдык хостооһун бу сыл 4-с кыбаарталыттан саҕаланыаҕа уонна сабаҕалааһын быһыытынан, 2041 сылга диэри алмааһы хостуохтара. Манна аһаҕас ньыманан хостууру былаанныыллар. Олунньуга Бүлүү сүнньһгэр олохтоохтортон каадырдары талбыттара.
Үгэс буолбут хаһаайыстыбаннай актыып мунньаҕа хампаанньа оҕо хампаанньаларын уонна салааларын бэрэстэбиитэллэрэ, итиэннэ “АЛРОСА” АХ кэтиир сэбиэтин бэрэссэдээтэлин бастакы солбуйааччыта, СӨ Ил Дархана Егор Борисов, хампаанньа генеральнай дириэктэрэ Сергей Иванов, СӨ Бырабыыталыстыбатын бэрэссэдээтэлэ Евгений Чекин, Саха сирин министиэристибэлэрин, биэдэмэстибэлэрин салайааччылара, норуот дьокутааттара, муниципальнай тэриллиилэр баһылыктара кыттыылаах буолан ааста.
Мария Васильева хаартыскаҕа түһэриитэ
