Войти

Войти

Англия үтүө санаалаах маҥан халааттаах аанньала Кэт Марсден төрөөбүтэ 160 сылыгар аналлаах «Маҥан халааттаах аанньаллар» диэн бырагыраама чэрчитинэн Бүлүүгэ «Бастыҥ медсиэстэрэ» диэн куонкурус ыытылынна. 

5 түһүмэхтээх күрэҕи СӨ культуратын туйгуна, «Алгыс» сынньалаҥ киинин исписэлииһэ Николай Афанасьев-Айдаман кыайа-хото тутан, бэрт кэрэхсэбиллээхтик салайан ыытта. Ол курдук күөн күрэскэ үстүү кыттааччылаах 6 хамаанда кииристэ: поликлиника, медсиэстэрэлэр Сэбиэттэрэ, оҕо отделениета, оҕо санаторийа, Кэт Марсден аатынан Бүлүүтээҕи психоневрологическай интэринээт, Н.С. Гоголев аатынан Чочутааҕы профилакторий.

Куонкуруһу сыаналыыр сүбэҕэ үлэлээтилэр: профилактика кабинетын бырааһа А.Е.Дмитриева, Кындыл аатынан Бүлүүтээҕи норуодунай театр режиссера М.А.Соколова, Чочутааҕы профилакторий кылаабынай бырааһа М.М. Алексеева. Бу иннинэ куорат баһылыга Н.В. Афанасьев эҕэрдэ тыл этэн баран, үчүгэй үлэлэрин бэлиэтээн, куорат 385 сыллаах үбүлүөйүнэй бэлиэлэрин маҥан халааттаах аанньалларга А.Е.Дмитриеваҕа, А.М.Кондаковаҕа, А.И. Егороваҕа үөрүүлээх быһыыга-майгыга туттартаата.

Хамаанданан бэйэни билиһиннэрииттэн саҕалаан медсиэстэрэлэр иэдэлэрин таһымын тургутан көрүү, көрдөөх ыйытыыларга эппиэттээһин, талааны көрдөрүү, ыарыһахха систиэмэни туруоруу түһүмэхтэрэ көрөөччүлэр болҕомтолорун тарта.

Сыралаах киирсии кэнниттэн Чочутааҕы профилакторий медсиэстэрэлэрин хамаандата кыайыылааҕынан тахсан, бастакы миэстэни ылла, иккискэ медсиэстэрэлэр Сэбиэттэрин хамаандата таҕыста. Үһүс миэстэҕэ Кэт Марсден аатынан Бүлүүтээҕи психоневрологическай интэринээт хамаандата тигистэ. Кыттыбыт хамаандаларга өйдөбүнньүк бириистэри, дипломнары, туоһу суруктары туттардылар.

Туой Хайа нэһилиэгиттэн Чочу профилакторийыгар кэлэн эмтэнэ сылдьар норуот талааннаахтара бэйэлэрин эҕэрдэ ырыаларынан, сахалыы киэргэллээх таҥастарынан, көрдөөх үҥкүүлэринэн күрэҕи киэргэттилэр, көрөөччүлэри олус сэргэхситтилэр.

 Николай ФЕДОРОВ, ulus.media

Тарҕат:

Добавить комментарий