Арассыыйа Доруобуйа харыстабылыгар министиэристибэтин профилактическай медицинскэй көрдөрүнүү саҥа быраабылатыгар олоҕуран, медицинскэй көрдөрүнүүнү (медосмотру) киһи 18 сааһыттан саҕалаан сыл аайы ааһыан сөп. Диспансеризацияҕа көрдөрүнүү киһи хас саастааҕыттан тутулуктаах. Чуолаан 18 саастан 39 сааска диэри, диспансеризация үс сылга биирдэ буолар. Онтон 40 саастан үөһээ -- сыл ахсын.
“Сорох дьон диспансеризацияны профкөрдөрүнүүнү (профосмотру) кытта бутуйар. Ити төрүт сыыһа, - диэн «Сахамедстрах» страховкалыыр медицинскэй хампаанньа сүбэлиир иһитиннэрэр киинин салайааччыта Таисия Евдокимова этэр. – Профкөрдөрүнүүгэ диспансеризацияттан аҕыйах чинчийии киирэр. Диспансеризация ааһар сылга профкөрдөрүнүүгэ киирэр чинчийиилэргэ эбии искэн үөскүүрүн быһаарар чинчийиилэр киирэн биэрэллэр”.
Профилактический медкөрдөрүнүүгэ киирэр:
- анал ыйытыы боппуруостарыгар эппиэттээһин;
- ыйааһын, уҥуоҕун үрдүгүн быһаарыы;
- хаан баттааһынын кээмэйэ;
- хааҥҥа саахары быһаарыы;
- хааҥҥа холестерины быһаарыы;
- 35 саастан электрокардиография;
- 39 сааска диэри сүрэх-хаан ыарыылара үөскүүр кутталын быһаарыы;
- 40 сааска сүрэх-хаан ыарыылара үөскүүр кутталын чуолкай чопчулааһын;
- флюорография;
- дьахталларга – биэлсэр эбэтэр гинеколог көрүүтэ.
Диспансеризация хайдах ааһарый?
Диспансеризация икки түһүмэҕинэн ааһар.
Бастакы түһүмэххэ профкөрдөрүнүүгэ эбии:
- 18 - 39 сааска диэри – үс сылга биирдэ - дьахталларга маткаҕа искэни көрөр скрининг;
- 40 саастан саҕалаан сыллата:
- хаан уопсай анаалыһа;
- харах иһинээҕи баттааһыны кээмэйдээһин;
- Суон уонна көнө оһоҕосторго искэни быһаарар скрининг ( 40 – 64 сааска диэри икки сылга биирдэ, 65 -75 сааска диэри сыл ахсын);
- эмиийгэ искэни быһаарыы (дьахталларга 75 сааска диэри);
- эр дьоҥҥо 45, 50, 55, 60 уонна 64 простата искэнин быһаарар скрининг;
- куолайга, искэ уонна сиэн оһоҕоско искэни быһаарар скрининг ( 45 сааска).
Диспансеризация иккис түһүмэҕэр эбии көрдөрүнүү, дириҥэтэн сэрэтии сүбэтэ ирдэнэр буоллаҕына ыыталлар.
Профилактическай көрдөрүнүүнү уонна диспансеризацияны ханна барыахха сөбүй, манна төһө бириэмэ барарый?
Сыһыарыылаах поликлиникаҕа. Бэйэни кытта пааспары, булгуччулаах медицинскэй страховкалааһын полиһын илдьэ сылдьаҕыт.
Көрдөрүнүүгэ төһө бириэмэ барара киһи сааһыттан тутулуктаах: холобура, аҕам саастаах дьоҥҥо көрдөрүнүү испииһэгэ улахан. Ортотунан, диспансеризация бастакы түһүмэҕин (поликлиникаҕа барыах иннинэ эрдэттэн бэлэмнэннэххэ) биир күнүнэн ааһыахха сөп. Уонна бары чинчийии түмүгүн билсэр онно сүбэ ылар инниттэн, терапевт бырааска иккистээн кэлии ирдэнэр. Мантан салгыы гражданнар профилактическай тэрээһиннэри киэһэ уонна субуотаҕа ааһар кыахтаахтар. Үлэлиир дьоҥҥо диспансеризацияҕа биир күн үлэттэн босхолонуу көҥүллэнэр, пиэнсийэҕэ тахсыахтаах уонна биэнсийэлээхтэргэ икки күн көрүллэр.
Диспансеризация кэмэ кэлбитин туһунан «Сахамедстрах» страховкалыыр медицинскэй хампаанньа страховой бэрэстэбиитэллэрэ страховкалаах нэһилиэнньэни смс, сурук ыытан эбэтэр эрийэн иһитиннэрэр. Кини сыһыарыылаах поликлиниканы, туһааннаах кабинет үлэлиир болдьоҕун барытын ыйан-кэрдэн биэрэр.
Итини таһынан, страховой бэрэстэбиитэл медицинскэй көмө бары боппуруостарыгар уонна Саха сирин доруобуйа харыстабылын биир кэлим Контакт киинин 8 800 100 14 03 быһа лииньийэтигэр киирбит ыйытыктарга эмиэ хоруйдуур.
«Сахамедстрах» страховкалыыр медицинскэй хампаанньа АУо лицензията ОС №2873 – 01 сэтинньи 09 күнэ 2016 с.
