Кулун тутар 16-18 күннэригэр “Ситим” медиа-бөлөх, ТХМ уонна Мииринэй дьаһалтата көҕүлээн “Байдам-2018” тыа хаһаайыстыбатын бородууксуйатын быыстапкатын тэрийэр.
Быыстапка чэрчитинэн бүгүн, кулун тутар 14 күнүгэр, аатырбыт асчыт Иннокентий Тарбаахап Мииринэйгэ олорор омук диаспораларыгар, түмсүүлэригэр, Мииринэй уонна Бүлүү сүнньүн улуустарын общепиттарын үлэһиттэригэр саха аһын-үөлүн астыырга маастар-кылаас ыытта. Мииринэй, Удачнай, Айхал, Светлэй, Чернышевскай асчыттара маастар кылаастан олус элбэххэ үөрэннилэр. Маастар кылааска уопсайа 80-ча кыттааччы кытынна, ол иһигэр 24 асчыт таһымнарын үрдэтэр. Кинилэр сарсын дьиэтээҕи сорудах быһыытынан балыктан паштеты астаан аҕалыахтара. Ол түмүгүнэн пуобардарга-асчыттарга таһымы үрдэппиттэрин туоһулуур разряд, кыттыбыттарын туоһулуур сэртипикээт туттарыллыаҕа.
Иннокентий Тарбахов бастаан асчыттарга үрүҥ аһы – саламааты, көбүөрү, дагданы, күөрчэҕи оҥоруу кистэлэҥнэрин билиһиннэрдэ. Салгыы эт бүлүүдэлэри – отон утаҕар таба уонна убаһа этиттэн стейк хайдах астанарын сиһилии көрдөрдө. Оттон бурдук астан балык бөрүөгүн, “Дыгын” пельмени, “Сандалы” бэрэскини уонна саха лэппиэскэтин астыыр ураты технологиялары арыйда. Кыһыллыбыт тоҥ балыгы, күндүөбэйтэн “Индигирка” салааты эмиэ астаатылар.
Алексей Горбиков, Удачнайдааҕы “Вернисаж” эрэстэрээн салайааччыта:
-- Олус туһалаах маастар кылааска кытынныбыт, элбэҕи биллибит. Биһиги эрэстэрээммит 13-с сылын үлэлиир. Маннык маастар кылаастар биһиги эргин ыытыллыбаттарын да кэриэтэ. Онон тэрийээччилэргэ, улуус дьаһалтатыгар улахан махталбытын биллэрэбит. Салгыы эрэстэрээммит менютугар саха төрүт аһын киллэриэхпитин баҕарабыт.
Иван Пудов, Оксана Копеева, “Феникс” ХЭУо, “Темп” маҕаһыын үлэһиттэрэ:
-- Биһиги бэйэбит бэкээринэлээхпит. Маастар кылааска таһыммытын үрдэтэбит. Сахалыы төрүт аһы кытары анаан-минээн билсэ кэлбиппит. Салгыы үөрүйэхпитин туһанан, саха аһын астаан атыылыыр соруктаахпыт.
Баир уонна Руслан, “Рябинушка” ХЭУо үлэһиттэрэ:
-- Биһиги анаан-минээн аатырбыт “Индигирка” салааты астыыр кистэлэҥнэрин кытары билсээри, үөрэнэ кэлбиппит. Руслан Киргизияттан сылдьар, оттон Баир – Бурятияттан. Биһиги омукпут куукуната уонна саха аһа-үөлэ майгыннаһар өрүтэ элбэх. Иннокентий Иннокентьевичка барҕа махталбытын тиэрдэбит уонна кини национальнай өрөспүүбүлүкэлэргэ баар кэллиэгэлэригэр уопутун атастаһара буоллар диэн баҕа санаалаахпыт.
Сарсын “Кулинария айана” диэн үгүс омугу түмэр ас-үөл бэстибээлигэр алмаастаах кыраайга түөлбэлээн олорор омук дьоно бэйэлэрин төрүт астарын билиһиннэриэхтэрэ уонна саха аһын астаан амсатыахтара . Билиҥҥи туругунан, манна 17 араас омук түмсүүтэ кыттара былааннанар. Бэстибээли Мииринэй улууһун баһылыга Ришат Юзмухаметов арыйыаҕа.
