Войти

Войти

Горнай улууһун дэлэгээссийэтэ  Дьокуускайга үгэс буолбут “Ас-үөл – 2019” быыстапка-дьаарбаҥкаҕа кытынна. Манна “Горнай-Ас” СХПК, агро-хайысхалаах Кэптин, Маҕарас, Мытаах, Атамай оскуолалара, 2 бааһынай хаһаайыстыбалар Вера Лиханова, Анатолий Пахомов баран оройуон аатын көмүскээн, үлэлэрин-хамнастарын кэпсээн кэллилэр.

Көрүү-куонкурус түмүгүнэн, дьүүллүүр сүбэ Горнай улууһун бэрэстэбиитэллэрин Л.Н.Харитонов аатынан Маҕарас агро-оскуолатын уонна “Горнай-Ас” СХППК оҥорон, үүннэрэн таһаарбыт бородууксуйаларын сыаналаан III истиэпэннээх дипломунан наҕараадалаата.

Онтон биир сонун хайысханы биир дойдулаахпыт, элбэх оҕолоох ийэ Вера Лиханова талбыт эбит. Вера “Сашок” диэн иистэнэр мастарыскыайын туһунан биһиги хаһыаппыт инники суруйан турар. Кини ол түбүктээх үлэтиттэн быыс булан, натуральнай аһы-пастиланы оҥорон саҕалаабыт.

Кини сир аһын, фруктаны хатаран баран, кэмпиэт курдук оҥорор. Онтуката саахара суох эрээри бэрт минньигэс, бэйэтин айылҕаттан амтанын илдьэ сылдьарынан сөхтөрбүт. Дьаарбаҥкаҕа кини кэмпиэтин элбэх киһи биһирээбит. СӨ Тыатын хаһаайыстыбатын миниистирэ Александр Атласов эмиэ амсайбыт. «Дьон атыылаһар буоллаҕына, кэлэр өттүгэр атыыга да таһаарыахха сөп”, – диэн Вера санаатын үллэстибит.

Бу күн Вера Лиханованы өрөспүүбүлүкэҕэ фермерскэй хамсааһыны сайыннарыытын иһин, Ил Түмэн Бочуоттуур Грамотатынан наҕараадалаабыттар. Биһиги Вераны ис сүрэхпититтэн эҕэрдэлиибит, саҥа, сонун бородууксуйата атыыга тахсан, олоххо киирэригэр баҕарыаҕыҥ.

Күннэй Алексеева, ulus.media

Тарҕат:

Комментарии

Защитный код Обновить