Бүгүн, алтынньы 11 күнүгэр “Айыы кыһата” национальнай гимназияҕа, “Ситим” медиа-бөлөх таһаарар “Бэлэм буол+” оҕо хаһыатын анал саайтын сүрэхтээтилэр.
Хаһыат кылаабынай эрэдээктэрэ Анна Захарова, кэрэспэндьиэн Айыына Трофимова мустубут үөрэнээччилэргэ хаһыат бэлэх ууннулар уонна саҥа саайт туһунан кэпсээтилэр. “Ситим” медиа-бөлөх генеральнай дириэктэрэ, Ил Түмэн дьокутаата Мария Христофорова оҕолорго үөрэхтэригэр ситиһиини, куруук кыайыылаах-хотулаах буолалларыгар баҕарда.
“Бэлэм буол+” оҕолорго аналлаах хаһыат 2014 сылтан тиһигин быспакка тахсар. Өрөспүүбүлүкэ бары улуустарыгар тарҕанар. Бу кылгас кэм иһигэр оҕолор уонна төрөппүттэр ортолоругар киэҥник биллэр буолла. Хаһыат биир сүрүн уратыта диэн, үс тылынан тахсар. Ол курдук, сахалыы, нууччалыы уонна аангылыйа тылынан. Ол иһин да буолуо, хаһыаты кыралыын, улаханныын бары интэриэһиргииллэр. Хаһыакка тахсар матырыйааллар иитэр-үөрэтэр сыаллаахтар, аралдьытар араас оонньуулар эмиэ тахсаллар. Ол курдук, айылҕаҕа, билимҥэ, култуураҕа, киһиэхэ, үгэстэргэ, араас норуоттар абыычайдарыгар уонна аныгы үйэ сиэринэн технологияҕа сыһыаннаах рубрикалар бааллар.
Нууччалыы “Будь готов” сыһыарыы га биллиилээх биир дойдулаахтарбыт: мусукааннар, худуоһунньуктар, байыаннайдар, бэлиитикэ, литэрэтиирэ диэйэтэллэрин уонна талааннаах ыччат туһунан сырдатыллар.
Оттон “Be ready” аангылыйа тылынан тахсар сыһыарыыга оҕолор омук тылын үөрэтэллэригэр араас сорудахтар, грамматика, лексика быраабылалара тахсаллар. “I speak English” диэн киини кытта бииргэ үлэлииллэр.
Оттон саайт оҕо болҕомтотун тардар дьэрэкээн ойуулаах-бичиктээх, олус сэргэх. Сахалыы “Тииҥ мэйии”, “Остуоруйа дойдута”, “Күннэйдиин астыхха”, нууччалыы “Исследуем, пробуем”, “Академия развития”, “Игральный мир” уонна аангылыйалыы “Grammar”, “Dictionary”, “Lets play” диэн рубрикалардаах. Ону таһынан, сонуннар, араас куоҥкурустар бааллар. Онон, “Бэлэм буол+” хаһыат оҕолорго өссө чугас буолбута кэрэхсэбиллээх. Хаһыат эрэдээксийэтэ ааҕааччыларын кытта көрсүһүүлэри куруук тэрийэр. Оҕолорго аналлаах араас тэрээһиннэри ыытар.
Татарстаҥҥа ыытыллыбыт “Медиа-Покорение” диэн оҕолорго уонна ыччакка аналлаах СМИ бүтүн Арассыыйатааҕы VI бэстибээлигэр, “Успуорт уонна чөл олох туһунан бастыҥ таһаарыы” номинацияҕа кыайыылааҕынан буолбута.
Саайт аадырыһа: belembuol.ru/
Инстаграм: @belembuol
