Ил Түмэн сис кэмитиэтин мунньаҕар дьокутаат, “Ситим” медиа-бөлөх генеральнай дириэктэрэ Мария Христофорова “Земскэй суруналыыс” диэн бырайыак туһунан кэпсээтэ.
“Билиҥҥи туругунан өрөспүүбүлүкэ үрдүнэн 34 улуус хаһыата баар. Баларга уопсайа 354 киһи үлэлиир. Кинилэр орто саастара 45-49. Алта оройуоннааҕы хаһыакка эрэдээктэрдэр, кэрэспэдьиэннэр, хоту улуустарга сүрүн эрэдээктэрдэр үлэлэрэ баар”, – диэн, Мария Христофорова иһитиннэрдэ.
Уонна аныгы кэмҥэ төрөөбүт тыл, бэчээттэнэр СМИ кыһалҕаларын таарыйда. “Земскэй учуутал”, “Земскэй быраас” курдук “Земскэй суруналыыс” диэн бырайыагы киллэрэн үбүнэн өйүүллэригэр этии киллэрдэ. Бу Ульяновскай уобалас губернатора Сергей Морозов идиэйэтэ буоларын эттэ.
Мария Николаевна этэринэн, тыа сиригэр үлэлии тиийбит суруналыыс быраастар уонна учууталлар курдук биирдэ бэриллэр харчынан уонна социальнай чэпчэтиинэн туһанар кыахтанар.
Дьүүллэһии кэнниттэн сис кэмитиэт чилиэннэрэ бу бырайыак туһугар куоластарын биэрдилэр. Онон алтынньы 23-24 күнүгэр парламент пленарнай мунньаҕар көрүллэр буолла.
