Алтынньы 18 күнүгэр Дьокуускай куоракка, “Путь к дому” диэн социальнай суолталаах аһымал аахсыйа ыытыллыа. Сыала-соруга – олох ыарахаттарыгар түбэспит, олорор дьиэтэ-уота, үлэтэ суох дьоҥҥо көмөлөһүү.
2018-2019 сылларга биэс аахсыйа уонна биир ый ыытыллыбыт. Уопсайа 264 киһи көмө көрдөөбүт. Олортон 91 киһи быстах кэмэ олорор дьиэ, үлэ уонна докумуоннарын оҥоттороллоругар көмө көрдөөбүттэр. Олортон 51 киһи ордон көмө ылбыттар. 13 киһи тыа хаһаайыстыбатыгар, маҕаһыыннарга, реабилитационнай тэрилтэлэргэ, суһал көмө ыстаансыйатыгар оробуочайынан үлэҕэ киирбиттэр. Биэс киһи дьиэ кэргэттэригэр, 16 киһи төрөөбүт дойдуларыгар төннүбүттэр. Үгүс дьон биэнсийэлэрин, пааспардарын, СНИЛС, ИНН, аттестаттарын уо.д.а. докумуоннарын оҥотторбуттар.
Бу аахсыйа 10.00-17.00 ч “Хоттей” (Ф.Попов уул 8/1) кафе аттыгар буолуоҕа. Кэлбит дьону фтизиатр, терапевт, нарколог быраастар көрүөхтэрэ, хаан анаалыһын ылыахтара уонна флюорографияҕа түһэриэхтэрэ. Ону таһынан, итии ас түҥэтиэхтэрэ. Баҕалаах дьону реабилитациялыыр тэрилтэлэргэ илдьиэхтэрэ.
“Путь к дому” аһымал аахсыйа СӨ киһи быраабыгар боломуочунай уонна ИДьМ Саха сиринээҕи салаатын көҕүлээһининэн ыытыллар.
