Алтынньы 16 күнүгэр Муома улууһун Хонуу нэһилиэгин Суон Тиит диэн учаастагар, саҥа хочуолунай үөрүүлээх арыллыыта буолан ааста. Бу туһунан бырабыыталыстыба пресс-сулууспата иһитиннэрэр.
Үөрүүлээх тэрээһиҥҥэ Ил Дархан Айсен Николаев, бырабыыталыстыба бэрэссэдээтэлин бастакы солбуйааччы Алексей Колодезников, ОДьКХ уонна энергетикэ миниистирэ Дмитрий Садовников, Муома улууһун баһылыга Иван Павлов уонна норуодунай дьокутааттар, олохтоохтор кыттыыны ыллылар.
“СӨ ОДьКХ быһаарыытынан уонна 32 мөл солк үбүлээһин көмөтүнэн кылгас кэм иһигэр саҥа хочуолунай тутуллан үлэҕэ киирдэ. Маннык үлэ бары арктическай улуустарга ыытыллыахтаах. Муома олохтоохторо олус сомоҕо дьон эбиккит диэммин үөрдүм. Баар кыһалҕалартан толлубакка үлэлээн-хамнаан төрөөбүт дойдугут сайдарын туһугар кыһалларгыт кэрэхсэбиллээх. Эһиэхэ өссө да үрдүк ситиһиилэри баҕарабын. Өрөспүүбүлүкэ салалтатын өттүттэн болҕомто, өйөбүл куруук баар буолуоҕа”, – диэн Ил Дархан эҕэрдэ тылын эттэ.
Улуус баһылыга Иван Павлов бу күҥҥэ оройуон үрдүнэн алта хочуолунай үлэҕэ киирбитин кэпсээтэ. Суон Тииккэ хочуолунай тутуллан инникитин манна саҥа түөлбэ тутуллар кыахтанна.
“Олохтоохтор ааттарыттан Ил Дархан Айсен Николаевка, улууспут баһылыгар Иван Павловка уонна ОДьКХ министиэристибэтигэр улахан махталбын тиэрдэбин. Дьиэбитин мантан инньэ саҥа хочуолунай сылытар буолара олус үчүгэй”, – диэн Суон Тиит олохтооҕо Анна Хабарова эттэ.
“Саҥа хочуолунай тутулларын өр күүппүппүт. Баҕа санаабыт туолан олоххо киирбититтэн олус үөрдүбүт. ОДьКХ үлэһиттэрэ сайын устата тутан дьэндэттилэр. Мантан инньэ күүстээх тымныылар түһүөхтэрэ, хочуолунайбыт алдьаныа диэммит куттаммаппыт. Бу үөрүүлээх күнүнэн Ил Дархан эҕэрдэлээбититтэн олус астынныбыт. Кини Арктика дойду биир киэн туттар сирэ буолуохтаах диэн сөпкө эттэ. Биһиги ону сайыннарар соруктаахпыт”, – диэн Хонуу олохтооҕо Лариса Бережнева эттэ.
Саҥа хочуолунай 2, 4МВт кыамталаах, 141 кв м иэннээх. Ыам ыйыттан алтынньы ыйга диэри тутуллан үлэҕэ киирдэ.
