Бэҕэһээ, алтынньы 17 күнүгэр, ТайгаПост саайт “Сиэйэ Уола Табаҕатааҕы холуонньаҕа баар Арчы Дьиэтигэр олохсуйбут” диэн иһитиннэриини таһаарбыта. Ону ааһан “киниэхэ көҥүлтэн сыанаҕа бииргэ үлэлэспит кэллиэгэлэрэ эрэ көмөлөһөллөр, кэргэнин холуонньа ааныгар көрбөтөхтөрө быданнаабыт” диэн суруйбута.
Ону чуолкайдаһаары, биһиги Сиэйэ Уолун кэргэнигэр Акулина Ивановаҕа эрийэ сырытыбыт.
— Кэргэним Виктор ити сорох интэриниэт саайтарыгар, социальнай ситимнэргэ тарҕаммытын курдук “Арчы Дьиэтигэр олохсуйбут” эҥин диэн сурах – туос-сымыйа. Кини холуонньа бэрээдэгинэн, устаабынан накаастабылын боруостуур. Холуонньа ирдэбилин быһыытынан, мин кэргэммин кытары үс ыйга биирдэ көрсөбүн, биирдэ передача тиэрдэбин. Онон ити суруйалларын курдук “хаһан да кэлэ сылдьыбат, көрбөтөхтөрө быданнаата” диэн суруйуулара олоҕо суох. Көҥүллүүллэрэ буоллар, нэдиэлэ аайы да көрсүөм этэ. Биһиги дьиэ кэргэн ыарахан кэммитигэр бэйэ-бэйэбитин өйөһөбүт, аҕабытын, кэргэммин хаһан дьиэтигэр, оҕолоругар букатыннаахтык төннөн кэлэрин күннэтэ ахтан, тэһийбэккэ кэтэһэбит.
Хаайыыга олорор киһини ойуччу тутан ханнык да Таҥара Дьиэтигэр, мечеккэ эбэтэр Арчы Дьиэтигэр олохсуппаттара биллэр. Ити пенитенциарнай тэрилтэлэргэ сокуону кэһии курдук сыаналанар. Онон итинник суруйуулар чуолкайа суохтарыгар ким да саарбахтаабат. Виктор Иванов болдьоҕун боруостуон иннинэ УДОннан тахсар сокуоннай быраабын туһанан, салгыы хадаатайыстыба биэриэхтээх этэ. Оттон итинник олоҕо суох сурахтары тарҕатаныынан кини босхолонорун туорайдаһа сатыыр интэриэстээх дьон дьарыктаналлар дуу диэн санаа үөскүүр.
kyym.ru
