Войти

Войти

Уус Алдан Тумулуттан төрүттээх баара-суоҕа 30 саастаах чааһынай урбаанньыт Петр Черкашин Хаҥалас улууһун Чапаево бөһүөлэгэр олорор. Кини ХИФУ физкултуура идэтигэр 2011 сыллаахха үөрэнэн бүтэрбитэ. Олорор бөһүөлэгэр “Якутянка” диэн ааттаах маҕаһыыны арыйан үлэлэтэр.

6. Petya           

Маҕаһыын хаһаайына Петр Черкашин.

Петр: - “Устудьуоннуу сылдьан 66, 67, 68 куорпустарга олорор устудьуоннарга бородуукта 8 көрүҥүн атыылыыр этим. Ол курдук, кола, натуральнай сок, "роллтон", кофе, "доширак" о.д.а. батарарым. Оччоттон атыыга-эргиэҥҥэ сыһыаннаах курдук эбиппин. 2009 сыллаахха Надябынанн ыал буолбуппут, кэргэним Ньурба Хаҥалас дэриэбинэтиттэн төрүттээх. Саха тылын учууталын идэтигэр үөрэнэн бүтэрбитэ. Икки оҕолоохпут. Улахан уобут Клим Өктөм лиссиэйигэр 1-кы кылааска үөрэнэр, кыра кыыспыт 1 саастаах.

Билигин бу дьиэ кэргэн биисинэһин быһыытынан маҕаһыыннаахпыт, 3 үлэһиттээхпит. Маҕаһыыммытыгар “Үтүө санаа долбуура” арыйан үлэлэтэбит. Үксэ бородуукта уонна канцтабаардар. Тыа дьоно наһаа сэмэйдэр, боростуойдар, онон да буолуо наһаа ыла сатаабаттар. Ол иһин олохтоох дьаһалта социальнай үлэҕэ испэсэлииһин кытта бииргэ үлэлэһэн, хас да нэдиэлэ аайы бөһүөлэкпитигэр баар элбэх оҕолоох, кыаммат, соҕотоҕун олорор ыалга бэйэбит сылдьан бородууктанан көмөнү оҥоробут.

Онон “Үтүө санаа долбуура” – бу нэһилиэнньэ кыаммат араҥатыгар бородууктанан, таҥаһынан-сабынан о.д.а. көмөлөһүү үлэбит биир сүрүн хайысхата буолар. Инникитин Ньурба Хаҥалаһыгар баар маҕаһыыммытыгар эмиэ маннык долбууру арыйары былаанныыбыт. Биһиги ыытар үлэбит хайысхатын төрөөбүт Тумулум (Уус Алдан) дьаһалтатын баһылыга Василий Алексеев өйөөн, онно эмиэ маннык үтүө санаа долбуурун бу күннэргэ, кулун тутар 18-гэр арыйыахтаахпыт.  

2

Кинилэр саҥата суох махтаммыт, үөрбүт харахтарын көрөртөн ордук үчүгэй туох баар буолуой? Маннык көмөнү оҥорон үлэҕиттэн дуоһуйууну ылар буоллаҕыҥ. Эмиэрикэ биллэр бизнесменэ, инвестора, дьону хамсатар спикер Роберт Кийосаки “Баҕа өттүнэн хайаан да көмөлөһүөхтээххин” диэн мэлдьи этэр. Мин итини кытары толору сөпсөһөбүн.

Бу аахсыйабытыгар ким баҕалаах бары көмөлөһөр. Бөһүөлэкпит 30-ча ыала ким төһө кыахтааҕынан кыттыһар, кинилэргэ махталым улахан. Дьэ, инстаграм күүһэ баар эбит – сүдү күүс. Билэр-билбэт дьоммут куоратынан, тыанан көмөлөрүн тиэрдэллэр. Дьокуускай куорат “Прогресс” маҕаһыын икки хайыһары спонсордаата. Маны тэҥэ биллэр өрөспүүбүлүкэ биллэр спортсменнар, бас-көс дьоннор Айаал Лазарев, Василий Стрекаловскай, Айхал Габышев, Албан Стрекаловскай о.д.а. көмөлөһөллөр.

3. Erik

Дьокуускай куораттан урбаанньыт Михаил Тарскай үтүө санаатынан ыыппыт сабыс-саҥа хайыһардарын Өктөм лиссиэйин үөрэнээччилэрэ, спортсменнар Эрик Романов уонна Павел Готовцев тутан үөрэн-көтөн тураллар.

Эдэрдэр эстафетаны салгыыллар, өйүүллэр. Маладьыастар!

4. Roman

Ытык кырдьаҕас Егор Егорович Андреев 

5. Ostrel

Матрена Егоровна Острельдина эдэр дьон көмөтүгэр улахан махталын тириэрдэр. 

Уйгулаана Федорова – 2 оҕолоох эдэр ыал ийэтэ: - Бэйэм Горнайтан кийииппин, олохсуйан олорбутум 10-ча сыл буолла. Ыытыллар аахсыйаҕа кыттыһан бородуукта атыылаһан бу долбуурга уурдубут. Бу ыытыллар аахсыйа атын да дэриэбинэлэргэ тарҕана, тэнийэ турарыгар баҕарыа этибит. Дьоҥҥо көмөлөһөр баҕа санаа бу эдэр дьоҥҥо киирбитэ наһаа үчүгэй.

Ньургуйаана Сивцева – Кэбээйиттэн төрүттээх, 2 оҕолоох эдэр ийэ: - Биһиги ыал бородууктанан уонна таба этинэн көмөлөстүбүт.

Виктория Попова – мэдиссиинэ үлэһитэ: - Бөһүөлэкпит иһигэр бу аахсыйа “Эстафетная палочка полки добра” диэн инстаграм нөҥүө ыытар үтүө үгэскэ кубулуйда. Онон нэһилиэнньэ олоҕо бу хамсааһынтан наһаа сэргэхсийдэ.

Дьэ, ити курдук бэҕэһээ, кулун тутар 15 күнүгэр Хаҥалас Чапаево бөһүөлэгэр тахса сылдьан, олус бэрт хайысхалаах үлэ биир көрүҥүн билсэн астынан, дуоһуйан киирдим. Эдэр ыччат бу идиэйэни хабан ылан, үлэни ыыталларын хайгыы көрдүм – иһиттим. Кытаатыҥ, уостан-тохтоон хаалбакка, амарах санаа аахсыйатын тиһигин быспакка салгыы ыыта тураргытыгар баҕарабын. Оҥорбут үтүө санаа бэйэҕэ, чугас дьоҥҥутугар уон оччонон эргийэн кэлэрин умнумуоҕуҥ!

Саргылаана БАГЫНАНОВА.

Дьокуускай-Хаҥалас-Дьокуускай.

Тарҕат:

Комментарии

Защитный код Обновить