Войти

Войти

Амма улууһугар “Мой бизнес” өҥөнү оҥорор киин салаата арылынна. Онон улуус урбаанньыттара ханна да ыраах барбакка, судаарыстыбаннай уонна муниципальнай өҥөлөрүнэн туһанар, сүбэ-ама ылар кыахтаннылар.

Киин үөрүүлээх арыллыытыгар  улуус баһылыга Николай Архипов, экэниэмикэни сайыннарыы управлениетын начаалынньыга Роман Алексеев, тыа хаһаайыстыбатын управлениетын салайааччытын солбуйааччы Алексей Шишигин, улуустааҕы бааһынай-фермерскэй хаһаайыстыба Ассоциациятын бэрэссэдээтэлэ Александра Цыпандина, улуус дьокутааттарын сэбиэтин урбаан кэмитиэтин бэрэссэдээтэлэ Людмила Куприянова уонна урбаанньыттар кыттыыны ыллылар.

Баһылык Николай Архипов олохтоохтору эҕэрдэлээтэ уонна маннык эттэ: “Биһиги улууспутугар “Мой бизнес” киин салаата  арыллыбыта олус үчүгэй. Мантан инньэ хас биирдии урбаанньыт  мунаахсыйар түгэнигэр күүс-көмө  ылара саарбахтаммат. Ол курдук, саҕалааччы урбаанньыттартан саҕалаан ситиһиилээх, атахтарыгар турбут бизнесменнэр интэриэһиргиир ыйытыктарыгар хоруй ылан, араас өҥөнөн туһаныахтарын сөп. Биһиги  урбаанньыттары муниципалитет таһымыгар өйүүр, кинилэргэ сөптөөх усулуобуйаны тэрийэр сыаллаах үлэлиибит”.

Киин бэнидиэнньиктэн бээтинсэҕэ диэри 9:00-18:00 ч үлэлиэҕэ. Үлэһиттэр улуустан тахсыбакка эрэ араас докумуоннары оҥоруохтара, тутуохтара. Ону таһынан, көҥүл биэрэр докумуоннары эмиэ оҥоруохтара.

Мин урбаанынан 2012 сылтан дьарыктанабын, ас эйгэтигэр үлэлиибин. Биисинэспин улаатыннарыахпын баҕарбытым ыраатта. Бүгүн “Мой бизнес” киин арылларын истэммин сүбэ-ама ылаары кэллим. Улууска маннык киин баар буолара олус үчүгэй. Биһиги үлэбитигэр-хамнаспытыгар докумуону сөпкө оҥоруу, ханна туох ыытылларын кэмигэр билэ-истэ  сылдьарбыт  ирдэнэр. Манна урбаанньыттарга туһаннаах көмөнү оҥороллор”, – диэн урбаанньыт Ирина Кузнецова санаатын үллэстэр.

yakutia24.ru/

Тарҕат:

Добавить комментарий

Бүтэһик сонуннар