Судаарыстыбаннай мунньах (Ил Түмэн) бырабыыталыстыбаннай чааһыгар нэһилиэнньэлээх пууннары гаастааһын туһунан кэпсэттилэр. Өрөспүүбүлүкэ бырамыысыланнаска уонна геологияҕа миниистирэ Максим Терещенко иһитиннэрбитинэн, 2022 сылга диэри Саха сирин 10 нэһилиэнньэлээх пууна гааска холбонуо.
Судаарыстыбаннай бырагырааманан 2019 сылга ороскуокка 96 мөл.солк. барыахтаах. Гаас ситимин тардыыга, саҥаттан оҥорууга, тутууга уонна гаастааһыҥҥа 1 миллиартан тахса суума көрүллүбүтэ.
Норуот дьокутааттара тыа сирин территориятын сайыннарыыга федеральнай судаарыстыбаннай бырагыраама чэрчитинэн нэһилиэнньэлээх пууннары гаастааһыҥҥа Саха сирин кыттыытын болҕомтоҕо ыллылар.
Өрөспүүбүлүкэ тыа хаһаайыстыбатыгар миниистирэ Александр Атласов бөһүөлэк иһинээҕи гаас ситимин тутуу боппуруоһа “Тыа сирин аныгылыы көстүүтэ” бырайыак чэрчитинэн эмиэ быһаарыллыан сөбүн эттэ.
Кэпсэтиигэ гаас ситимигэр куттал суох буолуутун хааччыйыы боппуруоһа эмиэ таарыйылынна. Дьокутааттар магистральнай ситимнэр уонна гаас тэриллэрэ биллэрдик эргэрбиттэрин бэлиэтээтилэр. Итилэр 25 сылтан 40 сылга диэри туһаныллар болдьохтоохтор. Дьокутааттар гаас ситимэ сөптөөх турукка турарыгар, эргэрбит учаастактар уларытыллалларыгар, саҥардыллалларыгар, гаас ситимин кэтээн көрүүгэ, диагностааһыҥҥа уонна эбийиэктэр туруктарын чинчийиигэ эбии үбү көрөрү туруорустулар.
