Киирии

Киирии

Бүгүҥҥэттэн Мииринэй куорат “Юбилейнай” атыы-эргиэн комплексыгар “Ситим” медиа бөлөх, “Кыым” хаһыат уонна “Байдам” сурунаал көҕүлээһиннэринэн “Байдам-2018” тыа хаһаайыстыбатын бородууксуйатын оҥорон таһаарааччыларын быыстапка-дьаарбаҥката саҕаланна. Бу тэрээһин үс күн устата буолуоҕа.

Бу быыстапканы “Мииринэй оройуона” МТ уонна ТХМ өйөөбүттэр. Быыстапка үөрүүлээх аһыллыыта сахалыы алгыһынан, сиэр-туом тутуһуллан саҕаланна. Алгыһы А. Саввинов оҥордо. Ол кэннэ мустубут дьону, быыстапка кыттыылаахтарын улуус баһылыга Р.Юзмухаметов уонна Мииринэй куорат баһылыга К.Антонов эҕэрдэлээтилэр. Быыстапка-дьаарбаҥканы көҕүлээн тэрийбит Мария Христофорованы ытыс тыаһынан көрүстүлэр.

YarmarkaBaidam8

YarmarkaBaidam2

 

Үгэскэ кубулуйбут “Байдам” дьаарбаҥкаҕа “Сахаагропродукт”, “Кладовые Олекмы”, “Скиф”, “Северное сияние” ПКФ, “Табаҕа” ХЭУо (Кириэстээх сэл.), Сунтаар улууһун Уһун Күөлүттэн С.Павлова бааһынай хаһаайыстыбата кытыннылар. Хомойуох иһин, “Кладовые Олекмы” аар-саарга аатырбыт сыырдарын кыайан аҕалбатылар, аны сайын хайаан да аҕалыахпыт диэн эрэннэрдилэр.

YarmarkaBaidam3

Быыстапка-дьаарбаҥкаҕа дьон олус көхтөөхтүк кытынна, павильон иһэ толору киһи. Мииринэйдэр сибиэһэй, олохтоох бородууксуйаҕа наадыйалларын өйдөөн, кыттааччылар ас арааһын, саха санаабытын барытын аҕалбыттар. Сыаната Мииринэй киэнинээҕэр быдан чэпчэки буолан, былдьаһа-тарыһа ыллылар. Холобур, таба этэ киилэтэ 350 солк., сиикээй арыы – 540 солк., чохоон – 200 солк., убаһа этэ – 500 солк. Оҥорон таһаарааччылар ыыһаммыт эт, балык ас арааһын, халбаһыыны, ветчинаны кыайа-хото аҕалбыттар. Маны таһынан, балык, үүт арааһа дэлэй.

YarmarkaBaidam4

Хомойуох иһин, билиҥҥи туругунан тыа хаһаайыстыбатын бородууксуйатын оҥорон таһаарааччылар оҥоһуктарын батараллара кэккэ ыарахаттардаах, ол механизма ситэ чопчулана илик. Бааһынайдартан бородууксуйаны атыылаһыы уонна батарыы күн-бүгүҥҥэ диэри бэрээдэктэммэккэ турар. Сорох тыа хаһаайыстыбатынан дьарыктанар улуустарга күүстээх оҥорон таһаарыы да кыаллыбакка  турар. Маныаха Кириэстээх “Табаҕа” ХЭУо атыттарга бастыҥ холобур буолуон сөптөөх. Кинилэр бородууксуйаларын тиһигин быспакка, харгыһа суох батарар курдук сөпкө дьаһанан олороллор. Кириэстээхтэр мииринэйдэри куруук сиикэй арыынан, сүөгэйинэн, чөчөгөйүнэн, йогуртунан хааччыйа олороллор. Кинилэр “Юбилейнай” атыы-эргиэн киинигэр сыл устата дьоҕус павильон ылан үлэлэтэллэр. Табаардара хамаҕатык барар уонна сыл ахсын арааһа элбии турар.

YarmarkaBaidam5

“Скиф” Дьокуускай ырыынагар кимэллээхтик кимэн киирбитэ, бородууксуйалар былдьаһыкка сылдьар. Билигин кинилэр Мииринэй ырыынагын кыайа-хото баһылаан эрэллэр. “Скифтэр” анал маҕаһыын арыйалларын мииринэйдэр бэркэ сэҥээрэллэр.

 

YarmarkaBaidam7

YarmarkaBaidam6

Быыстапкаҕа ынах, убаһа, таба этэ, кэтилиэт, тиэптэл, отон, моонньоҕон, сугун, сүөгэй былдьаһыкка барда. Бу сырыыга дьон талан ыларыгар бородууксуйа арааһа кэҥээбититтэн улаханнык астыннылар уонна тэрийээччилэргэ мииринэйдэр улахан махталларын биллэрэллэр.

Станислав Алексеев, Мииринэй куорат. Ааптар хаартыскаҕа түһэриитэ.

Тарҕат:

Ырытыы  

Сэргэй
+2 Сэргэй 17.03.2018 11:44
"СИТИМнэр"маладьыастар. Саамай улахан промышленнай оройуоммутугар-Мииринэйгэ атыы-эргиэн дьаарбанкатын ыыттылар ахан. Даже Удачнайга тиийэн атыы арааhын тэрийдилэр, саха дьонун харчылаатылар. "СИТИМ" кеметyнэн саха ыччата Мииринэйгэ yлэ5э киирбиттэрэ. Оннук программалаахтар эбит.Ким да кыайбата5ын оноро сылдьаллар.
Ответить
Боппуруос
+2 Боппуруос 17.03.2018 15:14
Ити "якутия24" диэн нвк туохха наадалаах каналы yлэлэттэ5э буолар.
Сонун да суох, сэргэх передача да суох. Ханнык эрэ Орловскай уобалас губернаторыттан интервью ылаллар. Арыт симфоническай орекстр, арыт центральнай каналлар передачалара. Наhаа куhа5ан.
Ответить
Павел
+2 Павел 19.03.2018 11:31
Промышленнай оройуоннарга саха ахсаана дуона суох, сабыдыаллара суох. Онон сyрyн промышленнай улуустарбытын илиибитигэр ылан иhиэхпитин наада этэ. Ити, правительственнай изданиелар промышленнай оройуоннарга 1 кyннээх "десаннарын" букатын испэр киллэрбэппин. "Для галочки"..Оттон иhиттэх аайы "Ситим" медиа группа Мирнэйгэ ярмарка ыытар, туруорсар. Маны хайгыыбын.
Ответить

Ырытыыгын суруй

Защитный код
Обновить