СӨ доруобуйа харыстабылын миниистирэ Елена Борисова иһитиннэрбитинэн, Аллайыаха улууһун Русскай Устье уонна Амма улууһун Сулҕаччы нэһилиэктэригэр фельдшерскэй-акушерскай пууннар (ФАП) үлэҕэ киирбиттэр. Бу ый бүтүүтэ Бүлүү улууһун Сосновка, Алдан оройуонун Якокит, ону таһынан, Ленскэйгэ уонна Уус Алдаҥҥа ФАП арыллаллара былааннанар.
“Үс пуун хаһан да мэдиссиинэ өҥөтө оҥоһуллубутах сирдэригэр тутулла турар. Инньэ гынан, бөһүөлэктэр олохтоохторо чугастыы мэдиссиинэ көмөтүнэн туһанар кыахтаннылар. Өссө биирдэ тоһоҕолоон этэбин, өрөспүүбүлүкэҕэ биир даҕаны мэдиссиинэ тэрилтэтэ сабыллыбат. Төттөрүтүн мэдиссиинэ өҥөтө суох сирдэригэр саҥа эбийиэктэри киллэрэбит”, – диэн Елена Борисова этэр.
Бу сылга түөрт пууну тутууга “Доруобуйа харыстабыла” национальнай бырайыак чэрчитинэн федеральнай бүддьүөттэн 22 мөл солк көрүллүбүт.
2020 сылга федеральнай бүддьүөттэн 98 мөл солк суумалаах 11 эбийиэк үлэҕэ киирэрэ былааннанар. Олортон тоҕуһа ФАП уонна икки амбулатория буолар.
