Өрөспүүбүлүкэҕэ “Култуура” национальнай бырайыак уонна “Киинэ пуондата” бырагыраамма чэрчитинэн, саҥа киинэ саалалара арыллыахтара. Ол курдук, биир киинэ саалыгар 5 мөл солк үп көрүллүбүт.
Бүгүн, сэтинньи 28 күнүгэр Горнай улууһун Бэрдьигэстээҕэр уонна Дьааҥы улууһун Баатаҕайыгар киинэ саалаларын үөрүүлээх арыллыыта буолар. Уопсайа сэттэ киинэ саалата арыллара былааннанар. Олортон түөрдэ федеральнай, иккитэ өрөспүүбүлүкэтээҕи, биир федеральнай уонна өрөспүүбүлүкэтээҕи бүддьүөттэн үбүлэнэр.
6,5 тыһ нэһилиэнньэлээх Бэрдьигэстээххэ 186 миэстэлээх киинэ саала, Семен уонна Софрон Даниловтар аатынан Духуобунас киинигэр арылынна. “Киинэ пуондата” бырагыраамма куоҥкуруһунан федеральнай бүддьүөттэн үбүлэннэ. Киинэ саалыгар саҥа тупсаҕай кириэһилэлэр, “NEC” лазернай тэрил туруохтаахтар, цифровой сервер уонна билиэт систиэмэтэ уларытыллыахтаах.
Оттон Баатаҕайга федеральнай бүддьүөттэн көрүллүбүт үбүнэн тэриллэр уонна кириэһилэлэр атыылаһыллыбыттар. Олохтоох бүддьүөтүнэн өрөмүөн үлэтэ ыытыллыбыт. “60 миэстэлээх киинэ саалата Арчы дьиэтигэр арыллыаҕа. Манна 5 м кэтиттээх экран, “NEC” саҥа тэрил, цифровой сервер, “Dolby” муусука, билиэт систиэмэлэрэ уонна кириэһилэлэр оҥоһуллуохтара”, – диэн өрөспүүбүлүкэтээҕи киинэ ситимин дириэктэрэ Петр Чиряев кэпсээтэ.
Сэтинньи 27 күнүгэр Бүлүү куоратыгар киинэ саалын таҥыы түмүктэннэ. Ахсынньы 5 күнүгэр арыллара былааннанар.
“140 кириэһилэ оҥоһулунна. Эргэ тэрил оннугар саҥаны туруоруохпут. Цифровой серверы уонна билиэт систиэмэтин уларыттыбыт.Федеральнай бүддьүөттэн өрөмүөннэннэ. Олохтоохтор хартыына, тыас-уус хаачыстыбатын астыныахтара дии саныыбын. Тоҕо диэтэххэ, улахан киинэ тыйаатырдарыгар турар тэрили аҕалан олортубут. Ону сыаналыахтара уонна киинэҕэ элбэхтэ сылдьар буолуохтара диэн эрэнэбин”, – диэн Петр Чиряев сырдатта.
Инникитин Орто Халымҕа саҥалыы оҥоһуллубут киинэ саала арыллара күүтүллэр. Оттон Өлөөҥҥө, Томторго (Өймөкөөн) уонна Зырянкаҕа (Үөһээ Халыма) арыллыахтара.
