Бүгүн Саха сиригэр Арктика күнэ бэлиэтэнэр. Бу күнтэн ыла үгэс буолбут тэрээһиннэр муус устарга диэри ыытыллыахтара.
Бүгүн Өксөкүлээх Өлөксөй аатынан Норуоттар Доҕордоһууларын Дьиэтигэр “Мир Арктики” эрэгийиэннэр икки ардыларынааҕы быыстапка-дьаарбаҥка буолуоҕа. Маны таһынан, Ойуунускай аатынан Саха тыйаатырыгар хотугу аҕыйах ахсааннаах норуоттар тыйаатырдарын “Север – мой край родной” кэнсиэрдэрэ буолар.
Кулун тутар 20-21 күннэригэр Саха сирин аҕыйах ахсааннаах хотугу норуоттарын VII сугулааннара буолуоҕа. Манна өрөспүүбүлүкэ 21 улууһуттан 119 делегат кыттыаҕа. Бу күннэргэ нэһилиэнньэ дьарыктаах буолуутун судаарыстыбаннай кэмитиэтигэр Арктика уонна хотугу улуустар олохтоохторугар үлэ дьаарбаҥката ыытыллыаҕа. “Сосновый бор” оҕо сынньалаҥ киинигэр “Арктика оҕолорун оонньуулара” III төгүлүн ыыттыллыаҕа. Оттон үгэс буолбут Хотугу норуоттар оонньуулара үһүс төгүлүн Эбээн Бытантай киинигэр – Саккырыырга ыытыллыаҕа.
Муус устар 2 күнүгэр ССРС судаарыстыбаннай бириэмийэтин лауреата, Ленин уонна Өктөөп өрөбөлүүссүйэтин уордьаннарын кавалера, Аҕа Дойду сэриитин кыттыылааҕа, табаһыт П.Погодаев 100 сааһын көрсө уопсастыбаннас мунньаҕа буолар. Муус устар 1-4 күннэригэр Иенграҕа “Таба иитиитэ – Арктика төрүт олохтоох норуоттарын олохторун төрдө” диэн норуоттар икки ардыларынааҕы сэминээр ыытыллара былааннанар.
Маны таһынан, Арктика күнүн чэрчитинэн, “Мин тапталлаах Арктикам 2030 сылга” диэн оҕо уруһуйун күрэҕэ ыытыллар. Күрэххэ үлэлэри кулун тутар 13-муус устар 30 күннэригэр ылаллар. Манна өрөспүүбүлүкэ 13 арктическай улуустарыттан – Абый, Аллайыаха, Анаабыр, Булуҥ, Үөһээ Халыма, Үөһээ Дьааҥы, Эдьигээн, Муома, Аллараа Халыма, Өлөөн, Орто Халыма, Усуйаана уонна Эбээн Бытантай оҕолоро кыттыахтара.
Санатар буоллахха, Ил Дархан Егор Борисов 2014 сыллаахха Арктика сыла түмүктэнэр үөрүүлээх мунньаҕар уонна Хотугу төрүт олохтоох аҕыйах ахсааннаах норуоттар Ассоциацияларын 25 сыллаах үбүлүөйүгэр Арктика күнүн биллэрбитэ.
