Алаһыай нэһилиэгэр оҕо саада «Сахам сирэ XXI-с үйэҕэ» үтүө дьыала өрөспүүбүлүкэтээҕи хамсааһынынан тутуллар. Былырыын халаан уутуттан сибээстээн тутуу тохтотулла сылдьыбыта. Дьиэ ис өттө, ититэр ситим турбатын сыбааркалааһын, электрическэй уоту тардыы үлэтэ хаалбыта.
Улуус баһылыгын Евгений Михайлович Слепцов өйөбүлүнэн оҕо саадын тутуу үлэтэ салҕанна. Билигин тутууну бэдэрээтчит ИП Вилен Константинович Исаков түмүктүү сылдьар. Кини биригээдэтигэр 3 кэлии, ону тэҥэ 4 олохтоох киһи үлэлиир.
«Үлэ алтынньы 25 күнүттэн салҕаммыта. Күн бүгүн саҥа оҕо саадын тутуу 80% ситтэ. Эбийиэккэ ис үлэ түмүктэнэн эрэр. Тутуу матырыйаала саас тиэллибитэ эрээри, ититэр ситими киллэриигэ уонна электрическэй уоту тардыыга сорох матырыйаал тиийбэтэҕэ. Онон Дьокуускайтан эбии сакаастаан, самолетунан уонна буранынан аҕалтарбыппыт. Муостата Дьокуускайга оҥоһуллубут эковатанан тэлгэннэ, үчүгэй матырыйаал эбит», — диэн кэпсээтэ бэдэрээтчит Вилен Исаков.
Билигин шпаклевкалааһын, линолеум тэлгээһинэ, плинтуһу саайыы уо.д.а. кыра үлэлэр хааллылар. Былаан быһыытынан үлэ ахсынньы 20 күнүгэр түмүктэниэхтээх, ол гынан баран тутааччылар былаантан эрдэ бүтэрэр сыаллаахтар.
«Оҕо саадын тутуутун нэһилиэнньэ туруорсубута ыраатта. Онон, ыра санаабыт туолан, эһиил саҥа дьиэҕэ үөрэ-көтө киириэхпит. «Чуораанчык» саҥа оҕо саада 40 миэстэлээх буолуо», — диэтэ «Чуораанчык» оҕо саадын сэбиэдиссэйэ Майя Иннокентьевна Березкина.
Кырдьык, нэһилиэккэ хас да сыллаах үлэ түмүктэнэн эрэриттэн оҕолуун, улахан дьоннуун бары олус үөрэллэр. Саҥа сылы көрсө бу тутуу нэһилиэнньэҕэ бэртээхэй бэлэх буолуо.
Римма Ноговицына, ulus.media/
