Войти

Войти

Ахсынньы 2-12 күннэригэр Бүтүн Арассыыйатааҕы сурутуу дэкээдэтэ буола турар. Бу кэмҥэ почта бары отделениеларыгар уонна podpiska.pochta.ru саайка киирэн баҕарбыт хаһыаккытыгар уонна сурунаалгытыгар чэпчэтиилээх сыанаҕа сурутар кыахтааххыт.

Кэлэр 2020 сыл бастакы аҥаарыгар ыытыллар сурутуу хампаанньата бу Сурутааччы күнүттэн саҕаланна. Дьокуускай Тутаах почтамыгар бу күн олохтоох хаһыаттары, сурунааллары бэлэмнээн, айан-тутан таһаарар “Ситим” медиа-бөлөх уонна “Сахапечать” АУо таһаарыыларын үлэһиттэрэ сурутааччыларыныын көрүстүлэр.

Ол курдук, бу тэрээһиҥҥэ биллиилээх уопсастыбаннай деятеллэр, бэлиитиктэр, блогердар, ону таһынан «Ситим» медиа-бөлөх, «Сахабэчээт» АУо, Н.Е. Мординов-Амма Аччыгыйа, “Сахамедиа” өрөспүүбүлүкэ иһитиннэрэр-бэчээттээн таһаарар холдинг, “Ил Түмэн” парламент хаһыатын үлэһиттэрэ кытыннылар. Чэпчэтиилээх декада үөрүүлээх чааһын “Туймаада” судаарыстыбаннай ансаамбыл ылбаҕай ырыата киэргэттэ.

Үгэс курдук, декада кэмигэр дойду үрдүнэн тахсар 1,5 тыһ. саататар, бэлиитикэ-экэниэмикэ, билим таһаарыыларын, оҕо сурунаалларын, хаһыаттарын сыаната 40 бырыһыаҥҥа тиийэ чэпчэтиллэр.

Ону таһынан почта эпэрээтэрин каталогар киирбит федеральнай уонна эрэгийиэн СМИ-лэрин таһаарыыларыгар тиэрдии сыанатыгар эбии 10% уонна 15% чэпчэтии көрүллэр. Оттон атын сурутуу ааҕыныстыбаларына каталогынан, туһааннааҕынан, 5% уонна 10% чэпчиир. Кинилэргэ хаһыаттар уонна сурунааллар ааттарыгар анал буукубалаах индекс суруллар.

«Бүтүн Арассыыйатааҕы сурутуу кыһыҥҥы декадатын Арассыыйа почтата төрдүс төгүлүн ыытарын килиэйиэннэр, сибээс отделениетыгар сылдьааччылар, podpiska.pochta.ru саайты туһанааччылар биһирии көрүстүлэр. Сурутуу – саҥа дьылга бэйэҕэ да, чугас дьоҥҥутугар да бэртээхэй бэлэх эрэ буолбатах. Бу түгэн үтүө дьыалаҕа, аһымал аахсыйатыгар кыттар кыаҕы биэрэр. “Үтүө санаа маһа” аахсыйаҕа кыттан, Оҕо дьиэлэригэр, Кырдьаҕастар-кыамматтар тэрилтэлэригэр, бэтэрээннэргэ, тыа сирин бибилэтиэкэлэригэр баҕарбыт хаһыаттаргытын-сурунаалларгытын сурутан бэлэхтиэххитин сөп, – диир, генеральнай дириэктэри почта биисинэһигэр, социальнай өҥөлөргө солбуйааччыта Ярослав Мандрон. – Биһиги хаһыаты-сурунаалы таһаарааччылардыын кыттыһан, сурутууну өйүүрү суолаталааҕынан ааҕабыт».

Ону таһынан, РФ Минкомсибээс иһинэн эрэгийиэн бэчээтин Эспиэрдиир сэбиэтин кытта сөпсөһүннэрэн оҥоһуллубут таһаарыылары тиэрдиигэ дьайар чэпчэтии кээмэйэ уонна усулуобуйата тохтообот. Арассыыйа Почтатын каталогунан муҥутуур улахан, 25 % чэпчэтиини туһаныахха сөп. Оттон альтернативнай сурутуу ааҕыныстыбаларын нөҥүө чэпчэтии -- 20 % буолар. Испииһэккэ 2,5 тыһ. тахса хаһыат-сурунаал баар, о.и. дойду уонна эргийиэн таһымнаахтар эмиэ.

Болҕойуҥ!!!

Почта отделениеларыгар “Үтүө санаа” маһа аһымал санаа аахсыйата бара турарын өссө төгүл санатабыт. Ким кыахтаах, үтүө санаалаах социальнай тэрилтэлэргэ – Оҕо дьиэлэригэр, Интэринээттэргэ, Бэтэрээннэр уонна кырдьаҕастар дьиэлэригэр, биирдиилээн дьоҥҥо сурутан биэриэн сөп. Бу бырагыраамаҕа интэриниэккэ podpiska.pochta.ru/derevo-dobra киирэн, кыттыахха сөп.

Манна даҕатан эттэххэ, Саха сиригэр УФПС 2500 үлэһиттээх 431 почта отделениета үлэлиир.

Почта сырыыта Саха сирин бүттүүнүн хабар, 34 муниципальнай улуус 21 почтатыгар хаһыат-сурунаал салгын суолунан эрэ тиэрдиллэр. Өрөспүүбүлүкэ административнай кииниттэн нэһилиэктэргэ диэри уопсайа 30928 км уһуннаах авиация 59 маршрута баар. Сайыҥҥы кэмҥэ почта уу суолунан, уопсайа 10330 км уһуннаах 32 хайысханан тиэрдиллэр.

Арассыыйа Почтатын Саха сиринээҕи салаатын корпоративнай коммуникацияларга кылаабынай исписэлииһэ Мария Горохова

Тарҕат:

Добавить комментарий

Бүтэһик сонуннар