Саха сирин Арктикатыгар “Жилье и городская среда” национальнай бырайыак иитинэн тутар хампаанньалар олорор дьиэни тутууну саҕалаатылар. Бу туһунан Айсен Николаев ТАСС ааҕыныстыбаҕа биэрбит интервьютугар суруллар.
“Биһиги бу сылга номнуо Үөһээ Халыма улууһугар олорор дьиэни тутууну саҕалаатыбыт. Бу улуус саамай бэлэмнээх: онно тутуу матырыйаалын бэлэмнииллэр. Тутар хампаанньалар үлэлииргэ бэлэмнээхтэрин биллэрбиттэрэ, биһиги кинилэри өйөөтүбүт” , — диир Айсен Николаев.
Кини өрөспүүбүлүкэҕэ Арктика зонатыгар 13 улуус киирэрин санатта, онно дьиэни тутуу 155 тыһ. кв.м. тэҥнэһэрин эппит. Араас улуустарга хаарбах дьиэ 1,5 – 37 тыһ. кв.м. тиийэ халбаҥныыр.
Ил Дархан билиҥҥитэ бары үлэ өрөспүүбүлүкэ бүддьүөтүгэр ыытылларын тоһоҕолообут. “Бу кыһалҕаны ДьУОХХ реформатын ыытыыга көмө буолар Пуонда бэркэ билэр уонна көмө буолар”, — диэн Айсен Сергеевич бэлиэтиир.
Саха сирин Арктикатыгар 13 улуус киирсэр: Абый, Аллайыаха, Анаабыр, Булуҥ, Үөһээ Халыма, Үөһээ Дьааҥы, Аллараа Халыма, Эдьигээн, Муома, Өлөөн, Орто Халыма, Усуйаана уонна Эбээн Бытантай.
