Нам улууһун киинигэр 1 №-дээх “Солнышко” уһуйаан 98 миэстэлээх саҥа дьиэтин үөрүүлээх арыллыыта буолан ааста. Бу туһунан СӨ үөрэх уонна билим министиэристибэтин пресс-сулууспата иһитиннэрэр.
Саҥа эбийиэк “Демография” национальнай бырайыак иһинэн икки ыйдарыттан үс саастарыгар диэри оҕолорго эбии миэстэлэри тэрийии федеральнай бырагыраамма чэрчитинэн тутуллубут.
Уһуйаан үөрүүлээх арыллыытыгар СӨ үөрэх уонна билим министиэристибэтин ресурснай хааччыйыы Киинин дириэктэрэ Василий Петров, Ил Түмэн норуодунай дьокутаата Наталья Румянцева, Нам улууһун баһылыга Юрий Слепцов, “Проектная компания “ДСА”” ХЭУо генеральнай бэдэрээтчит – дириэктэрэ Константин Николаев, Нам улууһун түмсүүлэрин салайааччылара, уһуйааннар сэбиэдиссэйдэрэ уонна оскуола иннинээҕи үөрэх тэрилтэлэрин бэтэрээннэрэ кыттыыны ыллылар. Константин Николаев уһуйаан сэбиэдиссэйигэр Саргылаана Корякинаҕа бэлиэ күлүүһү туттарда.
Саҥа уһуйааҥҥа түөрт бөлөҕүнэн оҕолор сылдьыахтара. Уһуйаан аныгы тиэхиньикэнэн уонна миэбэлинэн хааччыллыбыт. Онон оҕолор бары өттүнэн сайдалларыгар бары усулуобуйа олохтоммут. Бу Нам улууһун устуоруйатыгар бастакы уһуйаан тэриллибитэ 65-с сылыгар саҥа дьиэтин аанын арыйда.
