2024 сылга дылы улуустарга 18 онкология көмөтүн амбулаторнай киинэ баар буолуоҕа. Бу туһунан СӨ Доруобуйаҕа харыстабылын министиэристибэтин пресс-сулууспата иһитинэрэр.
“Улуустарга маннык кииннэри тэрийии – миэстэтигэр ыарыыны чопчу булан бохсорго, эмтииргэ көмөлөөх буолуо”, - диэн суруйаллар.
2019 сылга “Доруобуйа харыстабыла” национальнай бырайыак иитинэн маннык амбулаторнай онкологическай көмө кииннэрэ куорат 1-кы поликлиникатыгар, 2-с,3-с №-дээх Дьокуускай куораттааҕы балыыһаларга, Дьокуускай Мэдэссиинэ киинигэр, Алдан, Мэҥэ Хаҥалас, Нерюнгри, Мииринэй уонна Ньурба улуустарын киин балыыһаларыгар аһыллыбыт.
Искэн тахсыытыттан киһи өлүүтэ быйыл тохсунньу-балаҕан ыйдарыгар былырыыҥҥыга холоотоххо 1,6 бырыһыанынан түспүт (дойду һрдүнэн бу көрдөрүү – 27,7%).
Дьокуускайга Онкология киинин тутуутугар федеральнай бүддьүөттэн 5,9 млрд солк. көрүллүөҕэ, инньэ гынан 2023 сылга Саха сирэ сабыс саҥа, аныгылыы тэриллээх, 210 киһи көрдөрүнэр поликлиникалаах Онкология кииннэниэҕэ.
Быйыл “Онкопоиск” аахсыйаҕа 60 тыһ. киһи кыттыбыт,онтон 2 тыһ. кэриҥэ киһини салгыы чинчийиини ааһалларыгар мэктиэлээбиттэр.
Дьокуускайдааҕы онкология диспансерыгар быйыл федеральнай сөбүлэҥ быһыытынан 34 тэрилинэн хааччыйбыттар. Ол иһигэр УЗИ, реанимация тэрилэ, эпэрээссийэҕэ наадалаах эндовидеоскопическай комплекс, эндоскопия тэрилэ, лаборатория аналиһын, хирургия тэриллэрэ кэлбиттэр.
