“Ааспыт сылга социальнай хантараакка олоҕурбут судаарыстыбаннай социальнай көмөну 3,5 тыһ тахса ыал ылбыт. Уопсай суумата 293,1 мөл солк тэҥнэспит”, – диэн СӨ үлэҕэ уонна социальнай сайдыыга миниистирэ Елена Волкова иһитиннэрэр.
Санатар буоллахха, социальнай хантараак тиийиммэт-түгэммэт ыалга көмө буолар. Миниистир бэлиэтииринэн, ааспыт сылга бу көмөнү оҥоруу быраактыкатын кэҥэтиигэ үлэ ыытыллыбыт. Билигин социальнай хантараак усулуобуйатынан аадырыска харчынан көмө оҥоһуллар. Бу көмө урут олох ыарахаттарыгар түбэспит ыал кэккэ ирдэбиллэргэ эппиэттиир буоллаҕына бэриллэрэ.
Сыл түмүгүнэн социальнай көмөнү ылар дьонтон номнуо 16 %-на социальнай хантараакка олоҕуран ылар.
Елена Волкова бэлиэтииринэн, кэриҥин улаатыннарар эрэ сорук туруо суохтаах, баар механизм хат көрүллүөхтээх. Холобур, бу көмөнү ылааччылар кэккэ ирдэбиллэрэ хат көрүллүөхтэрэ.
