Тохсунньу 30 күнүгэр Ил Дархан Айсен Николаев Томпо оройуонун Тополинай нэһилиэгэр 75 миэстэлээх “Оленёнок” уһуйаан арыллыытыгар кыттыыны ылла. Айсен Сергеевич саҥа уһуйаан үлэһиттэрин, кырачааннары уонна төрөппүттэри үөрүүлээх бырааһынньыгынан эҕэрдэлээтэ. Ыраах сытар Тополинай нэһилиэгэр саҥа уһуйаан үлэҕэ киирбитэ, бу тыа сирин сайдыытыгар улахан болҕомто уурулларын көрдөрөр диэн эттэ.
“Нэһилиэк уонна оройуон сайдарыгар социальнай инфраструктура барыта баар буолуохтаах. Бүтэһик сылларга манна саҥа хочуолунай, хаарбах дьиэлэртэн көһөрүү бырагыраамманан элбэх кыбартыыралаах 16 дьиэлэртэн дьону көһөрдүлэр. Инники сылларга өссө үс дьиэ олохтоохторун көһөрүү былааннанар. Ону таһынан, бу олус тупсаҕай тутуулаах уһуйаан арыллан үлэҕэ киирдэ. Инниктин саҥа оскуола тутуутун саҕалыахпыт диэн эрэллээхпин”, – диэн Айсен Николаев баҕа санаатын эттэ уонна “Полидрон” оонньууну ыларга сэртипикээт бэлэхтээтэ.
Салгыы Томпо оройуонун баһылыга Яков Степанов эҕэрдэ тылын эттэ. Кини Тополинай нэһилиэгэ оҕо төрөөһүнүн көрдөрүүтүнэн оройуон үрдүнэн бастакы миэстэҕэ сылдьарын бэлиэтээтэ. Сыл аайы оскуолаҕа киирэр оҕо ахсаана элбии турарын эттэ. Ону таһынан, уһуйаан сэбиэдиссэйэ Мария Скрыбыкина уонна “Атлант” ХЭТ генеральнай дириэктэрин солбуйааччы Кирилл Федоров эҕэрдэлээтилэр.
Уһуйааҥҥа оҕолор оонньуур, сынньанар хосторун таһынан, толору хааччыллыылаах мэдиссиинэ кэбиниэтэ уонна көмпүүтэр кылааһа баар. Саҥа эбийиэк эрэгийиэннээҕи бырайыак чэрчитинэн тутуллубут. Иэнэ 951 кв м тахса. Уопсай суумата 153 мөл тахса солк тэҥнэспит. Онтон 95 мөл тахса солк федеральнай, 50 мөл тахса солк өрөспүүбүлүкэтээҕи уонна 6 мөл тахса солк оройуонааҕы бүддьүөттэн көрүллүбүт. Эбийиэк ааспыт сыл муус устар ыйтан саҕалаан кылгас кэм иһигэр тутуллубут.
