Ленскэй оройуонун Хамра нэһилиэгэр саҥа биэлсэр-акушер пууна (ФАП) арылынна. Бу туһунан оройуон дьаһалтатын пресс-сулууспата иһитиннэрэр.
Саҥа эбийиэк “Доруобуйа харыстабыла” национальнай бырайыак чэрчитинэн тутуллубут. Тутуу ааспыт сайынтан саҕаланан номнуо үлэҕэ киирбит. Ол эрэн, манна үлэлиир исписэлиистэр суохтар. Отчуот кэмигэр ФАП дьиэтин оройуон баһылыга Жумарт Абильманов, социальнай боппуруостарга баһылыгы солбуйааччы Нина Евстафьева уонна оройуоннааҕы киин балыыһа сүрүннүүр бырааһа Сергей Сумароков көрдүлэр.
Кылгас кэм иһигэр тутуллубут саҥа эбийиэк аныгы тэрилинэн хааччыллыбыт. Ол курдук, манна биэлсэр, көрөр кэбиниэттэр о.д.а. бааллар.
“Аспыт сыл сайыныгар Хамра нэһилиэгэр ФАП тутулларыгар оройуоннааҕы бүддьүөттэн 550 тыһ тахса солк көрүллүбүтэ. Билигин саҥа дьэндэйбит эбийиэги көрөн олус астынныбыт. Ититиитэ, уота баар, наадалаах тэрилинэн, миэбэлинэн хааччыллыбыт. Онон хаачыстыбалаах мэдиссиинэ өҥөтүн оҥорорго бары усулуобуйа оҥоһуллубут. Аны билигин киин балыыһаҕа биэлсэр булар сорук турар”, — диэн баһылыгы солбуйааччы Нина Евстафьева кэпсиир.
Ону таһынан, 2018 сылтан Ленскэйгэ оройуоннааҕы бүддьүөт көмөтүнэн Дьокуускайдааҕы мэдиссиинэ кэллиэһин филиалыгар “Лечебное дело” идэҕэ үөрэтэллэрин эттэ.
Билиҥҥи туругунан Хамра нэһилиэгэр 100 тахса киһи олорор. Нэһилиэк ыраах сытар буолан сайын өрүһүнэн эбэтэр кыһыҥҥы суолунан эрэ сырыы баар. Ярославскай нэһилиэгин баһылыгын солбуйааччы Валентина Чувашлева этэринэн, манна ФАП үлэлээбэтэҕэ сэттэ сыл буолбут. Онон олохтоохтор “Земский доктор” федеральнай бырагыраамманан биэлсэр кэлэригэр эрэнэллэр.
