Киирии

Киирии

Кулун тутар 21 күнэ – Саха сиригэр сылгыһыт күнэ. Бүгүҥҥүттэн саҕалаан Нам улууһугар улахан тэрээһиннэр ыытыллаллар. Бу бэлиэ күнү көрсө, ССТХА ректора Иван Слепцов сылгы иитиитигэр туох болҕомто уурулларын, төрүт дьарыкпыт сайдар саҕахтарын, инники кэскилин туһунан кэпсээтэ.

 — Сылгы иитиитэ – Саха сирин ураты национальнай баайа-дуола, киэн туттуута. Саха сиригэр сылгыны иитии ыччат уонна оҥорон таһаарыы бэтэрээннэрин көмөтүнэн саҥалыы тыыннаммыта, сайдар кэскиллэммитэ. Билигин хаһаайыстыбалар ыраах сытар сылгы учаастактарын ылан салгыы сайыннарар кыахтаннылар, сылгы базаларын тэрийэн үлэлэтэр буоллулар. Ити саҥалыы сылгы базаларыгар  бары үлэлиир усулуобуйа тэриллэр буолла. Сылгыһыттар үлэлиир усулуобуйалара сөптөөхтүк тэриллэр буоллаҕына, бу идэҕэ ыччат ылсан үлэлэһэригэр кыах бэриллэр.  Ити биллэн турар, биир күннээҕи үлэ түмүгэ буолбатах, элбэх кыһалҕалар быһаарыллыахтарын наада. Ол гынан баран, ону туоратарга билигин толору кыах баар.

Сыл ахсын өрөспүүбүлүкэҕэ сылгы төбөтүн ахсаана элбии турар. Инньэ биллэн турар идэлэригэр толору бэриниилээх сылгыһыттар улахан өҥөлөөхтөр.

Саха сирин тыатын хаһаайыстыбатын академията (ССТХА) уруккуттан сылгы иитиитинэн дьарыктанар идэлээхтэри өйүүргэ силистээхтик ылсан үлэлэһэр. ССТХА Хоту сир төрүт дьарыктарыгар каадырдары бэлэмниир базовай үрдүк үөрэх кыһатынан билиниллибитэ. Инньэ гынан, анал кафедра баар буолбута. Бу кафедра үөрэҕи тэрийиигэ, идэ таһымын үрдэтиигэ соруктаахтык ылсан үлэлиир. Сылгы иитиитигэр олоҕурбут билимҥэ уонна сылгы иитиитинэн дьарыктанар дьон холобурдарыгар тирэҕирэн, Академия сылгы иитиитин култуурунай нэһилиэстибэ эрэ курдук буолбакка, экэниэмикэ биир тутаах салаатынан сайыннарарга үлэлэһэр. Билигин биһиги кыһабыт ыытар быраактыкаҕа үлэтэ араас хабааннаах тэрээһиннэри киллэрэр. Ол курдук, агро-хайысхалаах оскуолаларга билим, үөрэх өттүнэн утумнаахтык үлэлэһии, сылгыһыттар таһымнарын үрдэтии, сылгы хаһаайыстыбаларын салайааччыларыгар уонна исписэлиистэригэр күүс-көмө буолуу. Манна анаан үөрэх бырагыраамата таҥыллан үлэлиир.

Туруоруллубут соруктары олоххо киллэрэргэ Академия үлэ миэстэтин биэрээччилэри кытары тиһигин быспакка алтыһан үлэлиир. Идэлээх дьон толору бэлэмнээх буолалларыгар быраактыка чааһа толору көрүллэр. Үөрэх бырагырааматын быһыытынан, устудьуоннар өрөспүүбүлүкэ АПК тэрилтэлэригэр быраактыкаланар кыахтаахтар. Маныаха үлэни биэрээччилэри кытары бииргэ үлэлэһэрбит ордук көдьүүстээх. Билигин устудьуоннар толору бэлэмнээх буолалларын инниттэн, тэрилтэлэргэ миэстэтигэр ыытан быраактыкаланалларыгар, сылгы хаһаайыстыбаларыгар базовай кафедралары тэрийэргэ кэпсэтии ыытабыт. Онон, бу идэ инники кэскиллээх буоларыгар саарбахтаабаппыт.

Түгэнинэн туһанан, сылгы иитиитигэр быһаччы буһа-хата сылдьар ытыктыыр дьоммутугар барҕа махталбын уонна истиҥ эҕэрдэбин биллэрэбин. Тус олоххутугар бары үчүгэйи баҕарабын. Этэҥҥэ буолуҥ!

Дириҥ ытыктабылы кытары, Саха сирин тыатын хаһаайыстыбатын ректора,

СӨ Ат спордун федерациятын бэрэсидьиэнэ Иван Иванович Слепцов.

Тарҕат:

Комментарии

Защитный код Обновить