Олунньу 7 күнүгэр Орто Халыма куоратыгар, Арктика улуустарыгар бастакынан IТ-киин арылынна. Бу туһунан СИА инновация министиэристибэтигэр сигэнэн иһитиннэрэр.
Бырайыагы Орто Халыма улууһун дьаһалтата уонна “ЯкСтар” хампаанньа олоххо киллэрбиттэр. Кииҥҥэ уон үлэлиир миэстэ баар. “ЯкСтар” хампаанньа үлэлииргэ аналлаах тэрилинэн, сибээс ханаалларынан толору хааччыйбыт. Киин үөрүүлээх арыллыытыгар ОДьКХ уонна энергетикэ миниистирэ Дмитрий Садовников, улуус баһылыга Евгений Слепцов, инновация министиэристибэтин сыыппара сайдыытын салаатын салайааччы Петр Николаев кыттыыны ыллылар.
Инновация министиэристибэтэ иһитиннэрбитинэн, бүтэһик икки сылга Сунтаарга, Намҥа уонна Аллараа Бэстээххэ IT-кииннэр арыллыбыттар.
