Өрөспүүбүлүкэ бырабыыталыстыбатын бэрэссэдээтэлин солбуйааччы Кирилл Бычков олунньу 13 күнүгэр Өлүөнэни туоруур күргэ тутуутун уонна ону туһаныы (көлөһүннэһин) туһунан концессионнай сөбүлэҥҥэ илии баттаһыахтара.
Вице-премьер этэринэн,бу улахан суолталаах инфраструктура эбийиэгин Ил Дархан Айсен Николаев куонкуруска кыайбыт хампаанньа салалтатын – “Восьмая концессионная компания” ХЭУо,”Ростех” корпорация консорциума уонна “ВИС” хампаанньа бөлөҕүн кытары баттаһыаҕа. Бу икки хампаанньа бөдөҥ эбийиэктэри тутууга улахан уопуттаах.
“Концессионнай сөбүлэҥ 2020-2044 сылларга диэн түһэрсиллэр. Быйыл чааһынай партнер үбүгэр күргэ бырайыага оҥоһуллуоҕа. Эһиилгиттэн күргэни тутуу саҕаланыа уонна 2025 сылга түмүктэниэ”, - диэн тойон Бычков этэр.
Күргэни тутуу сыаната бырайыак оҥоһуллубутун кэннэ чуолкайданыаҕа. Билиҥҥитэ 64 млрд солк.диэн суоттаналлар. 85 бырыһыанын федеральнай үптэн көрүллэр капитальнай грант харчыта, оттон уон бырыһына – өрөспүүбүлүкэ көрөр үбэ.
Кирилл Бычков этэринэн, докумуону баттаһыыыга Саха сирэ отоойкоҕо олорботун курдук оҥоһуллубут. Ол курдук, 2021сыл кулун тутар 1 күнүгэр дылы федеральнай үптэн бүддьүөт икки ардынааҕы трансферт түһэриллэрин курдук болдьоспуттар.
“Өскөтүн туох эмэ биричиинэннэн федеральнай үп киирбэт буоллаҕына, концессионнай сөбүлэҥ күүһүн сүтэрэр, сөбүлэҥ көтүрүллэр. Быйылгы бырайыактааһын ороскуотун барытын чааһынай партнер уйунар. Ол эбэтэр, бу сөбүлэҥ өрөспүүбүлүкэ интэриэһин учуоттуур курдук оҥоһуллубута. Бастаан федеральнай үп туһаныллар, онтон күргэ тутуллан үлэҕэ киирэрин саҕана, ол эбэтэр 2025 сылга өрөспүүбүлүкэ харчыта туһаныллар”, - диэн Кирилл Бычков тоһоҕолоото.
Зампред маны таһынан федеральнай граннарга быһаарыы ылыныллыбытын этэр. “Былырыын күргэ тутуутун Владимир Путин өйөөбүтэ. Маны таһынан, эбийиэк күргэлэри тутуу уонна тупсарыы федеральнай бырагырааматыгар номнуо киирбитэ. Үбүлээһинэ бүддьүөт тыырыытын кэмигэр быһаарыллыаҕа. Сөбүлэҥ баттаһынна да,биһиги федеральнай үбү болдьоммут кэмигэр ылыахпыт диэн эрэнэбит”, - диир вице-премьер. Маны таһынан, Кирилл Бычков Өлүөнэ күргэтинэн кыра уйуктаах массыыналар босхо айанныахтара, төлөбүрү улахан уйуктаах, таһаҕаһы тиэйэр эрэ көлөлөр төлүүр буолуохтарын туһунан эттэ.
