“Бүгүн, олунньу 17 күнүгэр, коронавирус Саха сиригэр бэлиэтэнэ илик. Бу өрөбөллэргэ уларыйыы суох. Саха сиригэр ыытыллар хонтуруол устата ОРВИлаан Соҕуруулуу Азия дойдуттан кэлбит 22 киһи быраастарга көрдөрбүтэ. Билигин 7 киһи кэтээн көрүүгэ сылдьар, атыттар тахсыбыттара. Анаалытар түмүктэрэ Дьокуускайга кэлбиттэрэ. Ол түмүгүнэн ким да коронавирустаабатах диэн бигэргэммитэ. Инньэ гынан, күн бүгүн өрөспүүбүлүкэҕэ бу ыарыы бэлиэтэнэ илик”, - диэн министир Елена Борисова кэпсээтэ.
Саха сиригэр тумуу уонна ОРВИ дьаҥа хаптайда. 3 саастарыгар дылы уонна 7-14 саастаах оҕолор тумуулууллара аччаата. Миниистир дьаҥ кэмигэр сэрэхтээх буолалларыгар уонна профилактикаҕа улахан болҕомтону ууралларыгар сүбэлиир.
Роспотребнадзор дьаһалынан, Кытайтан кэлбит дьону хааччахтыырга, кэтээн көрүүгэ диэн 12 Кытайтан кэлбит киһини харантыыҥҥа укпуттар. Кинилэри быраастар кыраҕатык кэтээн көрөллөр. Барыларыттан анаалыс ылбыттар. Өссө 14 күн устата туруктарын медиктэр кэтээн көрүөхтэрэ. Санатар буолахха, Дьокуускай куорат оскуолаларыгар карантин олунньу 23 күнүгэр дылы уһаабыта.
