Бу туһунан олунньу 18 күнүгэр бырабыыталыстыба отчуотун кэмигэр иһитиннэрдилэр.
“Эбээн-Бытантай оройуонун баһылыга Гаврил Горохов тыа хаһаайыстыбатын бородууксуйатын оҥорууга былааннарын кэпсээтэ. Ол курдук инникитин саха ынаҕын үүтүнэн сыыр оҥорор былааннаахтар. Тэриллэрин атыыласпыттар. Дьокуускайтан илдьэллэрэ эрэ хаалбыт”, — диэн бырабыыталыстыба пресс-сулууспата иһитиннэрэр. Эбээн-Бытантай улууһун сайдыытын сүрүн хайысхата — тыа хаһаайыстыбата. Манна саха сүөһүтүн иитэллэр.
Бырабыыталыстыба бу сыл тохсунньу 1 күнүнээҕи көрдөрүүтүнэн, улууска 790 төбө хороҕор муостаах баар. Бу ааспыт сыллааҕы былаантан 103,7 %. 2018 сылга холоотоххо 4,2 % элбээбит.
