Войти

Войти

Ньурба улууһугар Кыайыы Чорооно аахсыйа тохсунньу ыйтан саҕаламмыта. Олунньу 19 күнүгэр Үөдэйдээҕи «Айылгы» норуот айымньытын дьиэтигэр Кыайыы Чороонун туттарыы аахсыйата ыытылынна.


Аҕа дойду сэриитигэр Үөдэй нэһилиэгиттэн 81 киһи ыҥырыллыбытыттан сэрииттэн эргиллибиттэр ахсааннара – 40, сэрии толоонугар охтубуттар – 41. Үөдэй нэһилиэгэр Кыайыы 75 сылыгар анаан «Кыайыы Сулуһа» аахсыйаны тэрийии, Аҕа дойду Улуу сэриитигэр ыҥырыллан барбыт саллааттар ааттарын үйэтитэргэ Аал луук маска сырдык ааттарын тиһии, тыыл, үлэ бэтэрээннэригэр кыһамньыны ууруу, сэрии кыттыылаахтарын бойобуой хайысхаларынан көрдөрүү сулуһа, аны сайын ыытыллыахтаах өрөгөйдөөх Кыайыы ыһыаҕар «Гвоздика памяти» тыыннарын толук уурбут буойуннарга анаан сибэкки дьөрбөтүн уурууга бэлэмнэнии үлэтэ барыахтаах. «Победа: нам жить помнить» диэн кинигэ-альбом бэчээккэ бэлэмнэнэн тахсыахтаах. Бу туһунан нэһилиэк баһылыга Мария Пудовна Николаева киирии тыл этиитигэр билиһиннэрдэ.

IMG 20200220 WA0005

«Кыайыы Чорооно» аахсыйа кыттыылаахтара Ньурба оройуон Ытык сүбэтин салайааччыта Михаил Иванов, улуустааҕы бэтэрээннэр Сэбиэттэрин бэрэссэдээтэлэ Татьяна Олесова, Дьиикимдэ нэһилиэгин баһылыга Варвара Сухаринова Кыайыы 75 сылынан мустубут дьону эҕэрдэлээтилэр, үлэ хаамыытын билиһиннэрдилэр. Улууска бэлиэ сылга анаан араас хабааннаах тэрээһиннэр ыытыллалларын, ыччаты патриотическай тыыҥҥа иитиигэ үлэ барарын туһунан эттилэр. Улуустааҕы бэтэрээннэр Сэбиэттэрин бэрэссэдээтэлэ Т.П.Олесова кэлэр нэдиэлэттэн Кыайыы волонтёрдара, Ньурба патриоттара аахсыйаҕа кыттыһан улуус тэрилтэлэринэн айанныахтаахтарын туһунан кэпсээтэ. Дьиикимдэ нэһилиэгин баһылыга Варвара Анатольевна Сухаринова Үөдэй нэһилиэгин баһылыгар Мария Пудовна Николаеваҕа Кыайыы Чороонун үөрүүлээх быһыыга-майгыга туттарда.
Оройуон Ытык сүбэтин салайааччыта Михаил Иванов, улуустааҕы бэтэрээннэр Сэбиэттэрин бэрэссэдээтэлэ Татьяна Олесова үөрүүлээх түгэнинэн «Сулус» туорду быстылар. Кыайыы 70 сылыгар анаан оҥоһуллубут ахтыылартан, архыып докуомуоннарынан үйэтитэр сыалтан «Сирдээҕи олох чэчириирин туһугар» диэн кинигэни билиһиннэрдэ. Кыайыы Чорооно тэрээһини Дьиикимдэттэн “Төлөн” эр дьон ансаамбыла, Үөдэй оскуола-саадын кырачаан кыттыылаахтара киэргэттилэр.

IMG 20200220 WA0007

СӨ биллиилээх судаарыстыбаннай, уопсастыбаннай-бэлитиическэй диэйэтэл В.А.Петрова аатынан оскуола-саадыгар 30-тан тахса сыл үлэлиир учуутал Татьяна Ивановна Васильева оскуола-саадыгар сырытыннарда. Оскуолаҕа үбүлүөйгэ анаан бэлэмнэнии үлэ барара тута харахха быраҕыллар. Киэн туттар дьонноругар, буойун учууталларга аналлаах истиэндэлэр, Кыайыы сылыгар анаан кыһыл муннук оҥорбуттарын, Кыайыы 75 сылыгар анаан бырайыактарга үлэлэһэллэрин туһунан кэпсээтэ. Ааспыт сылга таас оскуола-саад акылаата түһэн, 2021 сылга үлэҕэ киириэхтээҕин туһунан сүргэтэ көтөҕүллэн туран эттэ. Түмүккэ, кэлбит ыалдьыттар «Ытык өбүгэлэр» аһаҕас халлаан анныгар түмэлгэ сылдьан астыммыттарын биллэрдилэр.

IMG 20200220 WA0006

Антонина Семенова

Тарҕат:

Добавить комментарий

Бүтэһик сонуннар