Войти

Войти

Болугур нэһилиэгэр Юрий Семенов директордаах “Элма” ХЭТ соҕотох аҕаҕа дьиэ көҥдөйүн тутан бүтэрдэ. Субуотунньукка улуус баһылыга Николай Архипов, Болугур нэһилиэгин баһылыга Степан Кузьмин, “Спецназ добра” өрөспүүбүлүкэтээҕи уопсастыбаннай тэрилтэ төрүттээччитэ Руслан Платонов кытыннылар.

Болугур нэһилиэгэр 4 оҕолоох Артур Таппыровка үтүө санаанан салайтаран хорсун эр дьон дьиэтин көҥдөйүн тутан дьэндэттилэр. Тутууну “Элма” ХЭТ бэйэтин баҕа өттүнэн тутан саҕалаабыта.

“Бу дьиэ ааспыт сылга тутуллуохтааҕа. Бастаан тыа хаһаайыстыбатын бырагырааматыгар киирсэн сакаас быһыытынан тутуохтаах этибит. Ол гынан баран бырагыраамаҕа үп-харчы кыаллыбакка киирсибэтэх этэ. Онтон кини соҕотох аҕа, колхозка үлэлиирин истэн баран, бэйэм тэрилтэм күүһүнэн тутан биэрэргэ санаммытым. Тутуутун маһыгар чэпчэтии көрүллэн бэйэтэ атыыласпыта. Онтон атынын, Ленскэйтэн тиэйэн аҕалыытын иҥин барытын бэйэбит уйуннубут. Маннык үлэһит боростуой дьоҥҥо көмөлөһүөххэ наада дии саныыбын. Бэйэм ийэм бу Болугуртан төрүттээх”, – диэн этэр тэрилтэ директора Юрий Семенов.

WhatsApp Image 2020 02 27 at 19.15.01 2

Юрий учуутал идэлээх аҕата өссө хас да сыллааҕыта Ленскэй улууһун саамай түгэх нэһилиэгэр Толооҥҥо бэйэтин күүһүнэн спортсаала тутан үлэҕэ киллэрбитэ күн бүгүнүгэр диэри үлэлии турар эбит. Онон кини аҕатын үтүө бачыымын санаан, кини холобурун батыһыахха диэн санаанан салайтарбыт. Икки нэдиэлэ устата үлэлээннэр дьиэ көҥдөйө бүтэн эрэр. Бу үтүө дьыаланы 2017 сыллаахха “Спецназ добра” диэн уопсастыбаннай эр дьон хамсааһынын тэрийбит Руслан Платонов өйөөн субуотунньукка кыттыста.

Бу хамсааһын Амма улууһугар салайааччыта, Болугур нэһилиэгин баһылыга Степан Кузьмин маннык хамсааһыны хайаатар да өйүөххэ наада диэн этэр. “Тэрилтэлэрбэр ыҥырыы таһааран эр дьон таҕыстылар. Манна Ил Түмэҥҥэ депутаппыт Руслан Еремеевич Федотов үлэһит дьону аһатар повар хамнаһын уйунабын диэн баҕа санаатын эппитэ. “Эксперт-телеком” тэрилтэ эмиэ көмөлөспүтэ. Ити курдук бары кыра-кыралаан көмөлөөн биир киһибитин дьиэлээн эрдэхпит. Дьиэлээх хаһаайын 4 оҕолоох. “Болугур” хаһаайыстыба биир туруу үлэһитэ буолар”, – диэн кэпсиир Степан Николаевич. 

Дьиэ кырыысатын туруорууга улуус баһылыга Николай Архипов тус кыттыыны ылан, маннык үтүө хамсааһыннар хайаатар да баар буолуохтаахтар диэн этэр.

WhatsApp Image 2020 02 27 at 19.15.22

Салгыы бу дьиэни бырагыраамаларга киллэрэн ситэриэххэ наадатын бэлиэтээтэ. “Олус диэн үөрэбин. Бэйэм “Болугур” хаһаайыстыбаҕа ыанньыксытынан үлэлээбитим ыраатта. Бастаан тырахтарыыстаабытым. Түөрт оҕолоохпун. Икки кыыс уонна икки уол. Кырам 4 саастаах. Саамай улаханым 6 кылаас. Оҕолорбун кытта бэйэбит кыра уопсай дьиэҕэ олоробут. Наһаа ыарахан. Онон бу саамай баҕарар баҕа санаабыт – саҥа дьиэбит тутуллан эрэриттэн үөрэбин. Аны ханнык эмэ бырагыраамаҕа хапсан дьиэбитин ситэрбит киһи диэн баҕарабын. Чугас дьонум Василий уонна Татьяна Павловтар диэн дьиэ кэргэн. Туох баар кыһалҕабар барытыгар көмөлөһө олороллор. Бу тутааччы уолаттарга, миэхэ күүс-көмө буолар дьоҥҥо дириҥ махталбын этэбин”, – диэн этэр Артур Патриотович Таппыров.

Дьэ бу курдук өрөспүүбүлүкэбитигэр биллэриллибит Дойдуга бэриниилээх буолуу сылыгар эр санаалаах дьиҥ эр дьон харыларын ньыппарынан, уруучука оннугар сүгэ, өтүйэ уонна эрбии тутаннар биир дьиэ көҥдөйүн дьэндэттилэр. Бу курдук барыны харчынан эрэ мээрэйдээбэккэ, сүрэххэ үтүө санааны сөҥүөрэн ыытыллар тэрээһиннэр салҕана турдуннар.

Наталья Бубякина, ulus.media/

Тарҕат:

Добавить комментарий

Бүтэһик сонуннар